Гуравдугаар сарын 19-ний өдөр үл мэдэгдэх этгээдүүд, босогчид байж болзошгүй хүмүүс Хятадын хяналтад байдаг алт олборлох объект руу халдсан гэж Төв Африкийн Бүгд Найрамдах Улсын эрх баригчид мэдэгдсэнийг News18 сайт мэдээлжээ. 

Эх сурвалжийн мэдээлснээр, босогчид алт олборлох компани руу халдаж, Хятадын есөн иргэний амь насыг хөнөөжээ. Камерунтай хиллэх хилээс холгүй орших нутагт босогчид Хятадын гурван иргэнийг барьцаалснаас хэд хоногийн дараа энэ халдлага болсон байна. 

Төв Африкийн эрх баригчдын мэдэгдсэнээр,Чимболо алтны уурхайд хийсэн халдлага гуравдугаар сарын 19-ний өглөөний таван цаг орчимд болсон бөгөөд зэвсэгт этгээдүүд хамгаалалтынхныг буудаж, дараа нь ажилчид руу гал нээсэн байна. Энэ уурхайг халдлага болохоос хэдхэн хоногийн өмнө нээсэн байжээ.

Халдлага үйлдсэн этгээдүүдийг эрэн сурвалжилж байгаа гэж орон нутгийн эрх баригчид мэдэгдээд болсон хэрэгтэй холбоотой дэлгэрэнгүй мэдээлэл өгөөгүй байна.

Г.Бямбасүрэн