БНХАУ-ын дарга Ши Жинпинь ОХУ-ын Ерөнхийлөгч Владимир Путиний урилгаар гуравдугаар сарын 20-22-ны өдрүүдэд Орост төрийн айлчлал хийх талаар ТАСС агентлаг мэдээллээ. 

Гуравдугаар сарын 10-ны өдөр Бүх Хятадын Ардын төлөөлөгчдийн хурлын чуулганаар гурав дахь удаагаа сонгогдсоныхоо дараа Ши Жинпинь анхны гадаад айлчлал хийх орноороо Оросыг сонгожээ. Хятадын Гадаад хэргийн яамны мэдэгдсэнээр энэхүү нөхөрсөг айлчлал нь хоёр орны стратегийн хамтын ажиллагаанд түлхэц болохын дээр хоёр талт харилцааг хөгжүүлэхэд дэмжлэг болж, харилцан итгэлцэл, ойлголцлыг улам бэхжүүлэх аж.

Сүүлийн жилүүдэд Хятад, Оросын төрийн тэргүүнүүд нягт холбоо харилцаатай байсан гэдгийг Хятадын ГХЯ онцолсон байна. Тодруулбал, сүүлийн. 10 жилийн хугацаанд Ши Жинпинь болон Владимир Путин нар 40 гаруй удаа харилцжээ. Хамгийн сүүлд гэхэд 2022 оны 12 дугаар сард цахимаар уулзсан байна. Үүнээс өмнө хоёр болон зургадугаар сард утсаар ярьсны дээр хоёр талт уулзалтыг хоёронтаа биечлэн хийж байв.

Австрали, Их Британи, Канад, АНУ зэрэг орнууд хүний эрхийг зөрчиж байгаатай холбоотойгоор Бээжингийн олимпыг бойкотлож байх үеэр Путин олимпын наадмын нээлтийн ёслолд оролцож байсан бол энэ удаад Украины хямрал үргэлжилж, барууныхны зүгээс Оросын эсрэг зогсож байгаа үед Ши Жинпинь Орос руу явж байгаа нь анхаарал татсан үйл явдал гэж ТАСС онцолжээ.

Эх сурвалжийн мэдээлснээр, гуравдугаар сарын 20-ны өдөр Путин болон Ши Жинпинь нар нүүр тулсан уулзалтыг Кремльд хийх  аж. Энэ уулзалтын үеэр Орос, Хятадын худалдаа эдийн засгийн хамтын ажиллагаа, тэр дундаа эрчим хүчний салбарын хамтын ажиллагааг хэлэлцэх юм байна. Мөн олон улсын асуудлаар хэлэлцэж, Украин дахь нөхцөл байдлын талаар санал бодлоо солилцоно гэж Кремлийн хэвлэлийн алба мэдээлжээ. 

Г.Бямбасүрэн