Өнгөрсөн долоо хоногт Оросын цэргүүдэд буудуулан амиа алдаж буй Украины олзны цэргийг харуулсан дүрс бичлэг цахим орчинд тархаж, ихээхэн дуулиан дэгдээсэн. 

Энэ бичлэг дээр олзны цэрэг зэвсэггүй байх бөгөөд тамхи татан, улмаар буудуулахын өмнө "Слава Украине" буюу "Украин мандтугай" гэж хэлж байгаа нь дүрслэгдсэн юм. Гуравдугаар сарын зургааны өдөр олон нийтийн сүлжээнд тавигдсан энэ бичлэг олон улсад ихээхэн шуугиан тарьж байлаа. 

Энэ бичлэг дээр дүрслэгдсэн цэрэг нь Украины Зэвсэгт хүчний цэргийн алба хаагч Александр Мациевский байжээ. Түүнийг Украины Баатар цолоор нэхэн шагнал тушаалд Володимир Зеленский гуравдугаар сарын 12-ны өдөр гарын үсэг зурсан байна. 

"Өнөөдөр би Александр Мациевскийд Украаины Баатар цол нэхэн олголоо. Бүх украин хүн мэдэх цэрэг эр, тэр хүнд олголоо. Түүнийг мөнхөд дурсах болно. Түүний эр зориг, Украинд итгэснийх нь төлөө болон "Украин мандтугай" гэснийх нь төлөө үүрд дурсана" хэмээн Зеленский мэдэгджээ.

Украины Аюулгүй байдлын албаны мэдээлснээр, Александр Мациевский 2022 оны гуравдугаар сард цэргийн албанд татагджээ. Өнгөрсөн оны 12 дугаар сарын сүүлээр тэрбээр Красная гора суурин орчмоос алга болсон, сураггүй болсонд тооцогдож байсан аж. Түүнийг 2022 оны 12 дугаар сарын 30-ны өдөр буудан хөнөөсөн гэдгийг Украины Тусгай алба тогтоосон байна. Цогцосыг нь 2023 оны хоёрдугаар сард ар гэрийнхэнд нь хүлээлгэн өгчээ.

Г.Бямбасүрэн