Лхагва гарагийн үдэш Гүржийн нийслэл Тбилиси хотын төвд нөхцөл байдал хурцаджээ. Энэ хотод Гүржийн парламент дэмжсэн "гадаадын агентын тухай" хуулийн эсрэг олныг хамарсан эсэргүүцлийн жагсаал хоёр дахь өдрөө үргэлжилсэн юм. 

ВВС агентлагийн мэдээлснээр, олон мянган хүнийг хамарсан жагсаал харьцангуй тайван өрнөж байсан ч жагсагчдын нэг хэсэг нь  парламентын барилгыг бүсэлж эхлэх үеэр буюу үдшийн 23:00 цагийн үеэс нөхцөл байдал хурцдаж эхэлжээ. Эсэргүүцэгчид парламентын байрны цонхыг хагалах гэж оролдон, харин цагдаа болон тусгайгийнхан усан буу, гэрэлт дуут гранат болон нулимс асгаруулагч хий ашиглаж байгааг харуулсан дүрс бичлэгүүд олон нийтийн сүлжээгээр тархсан байна. Эсэргүүцлийн арга хэмжээ хүчирхийллийн шинжтэй болсон тул ийм арга хэмжээ авсан гэж Гүржийн эрх баригчид мэдэгджээ.

Эсэргүүцэгчдийн эсрэг нулимс асгаруулагч, гранат зэргийг хэрэглэсний дараа парламентын өмнөх талбай болон ойр орчмын гудамжуудаас жагсаалд оролцогчдыг тусгайгийнхан шахан хөөж эхэлсэн аж. Нийслэлийн төв хэсэгт тусгай болон цагдаагийнхан маш олуулаа байсан гэж гэрчүүд өгүүлжээ. Ингээд шөнө дундаас хойш жагсаалыг бүрэн тарааж, тусгайгийнхан Парламентын эсрэг талын талбайг эзлэсэн байна.

Сөрөг хүчний шаардлага 

Гадаадын агентын тухай гэгдэх хуулийг эсэргүүцэж буй сөрөг хүчний зохион байгуулсан жагсаалд гуравдугаар сарын наймны өдөр олон мянган хүн оролцсон талаар DW агентлаг мэдээлжээ. Жагсаалд оролцогчид хуулийн төслийг парламентаас эргүүлэн татах, гуравдугаар сарын долооны өдөр эсэргүүцлийн арга хэмжээний үеэр саатуулагдсан жагсагчдыг суллах гэсэн хоёр шаардлага тавьж байгаа аж. 

Энэ хоёр шаардлагыг биелүүлэхэд ердөө нэг цагийн хугацаа өгчээ. Нэг цагийн дотор тавьсан шаардлагыг нь биелүүлэхгүй бол "өөр арга хэмжээ авна" хэмээн мэдэгдсэн байна. Ингээд парламентын ордныг бүслэн, зарим жагсагчид бамбар асаан барьж, барилгын хашааны хаалгыг эвдэхийг оролджээ. Мөн барилгын нэгдүгээр давхрын хэд хэдэн цонхыг хагалсны улмаас цагдаагийнхан эсэргүүцэгчдийг намжаахаар нулимс асгаруулагч хий зэргийг ашигласан аж.

Хэдийгээр гуравдугаар сарын наймны жагсаалыг хүчээр тараасан ч сөрөг хүчнийхэн өдөр бүр жагсана гэж "Үндэсний нэгдмэл хөдөлгөөн" сөрөг хүчний намын дарга Леван  Хабеишвили мэдэгдээд, гадаадын агентын тухай хуулийг хэвлэсэн цаас гарагж ирэн олны өмнө шатаажээ.

Маргаантай хуулийн төсөл

Гүржид эсэргүүцэл дагуулсан "гадаадын агентын тухай" хуулийн төслийн албан ёсны нэр нь "Гадаадын нөлөөллийн ил тод байдлын тухай" юм. Энэ хуулийн төсөлд тусгаснаар, хилийн чанадаас санхүүждэг аливаа байгууллагыг "гадаадын агент" гэж бүртгэлд оруулах аж. Төсвийнх нь тавны нэгийг гадаадын санхүүжилт эзлэдэг байгууллагууд ч ийм бүртгэлд бүртгүүлэх ёстой гэнэ. Ийнхүү бүртгүүлэхгүй бол асар өндөр торгууль оноохоор заажээ. 

Гүржийн эрх баригч "Гүржийн мөрөөдөл" нам Аугаа хямралын үеийн Америкийн хуулиас жишиг аван хуулийн төслийг боловсруулсан хэмээн мэдэгдэж байгаа бол Гүржийн Ерөнхийлөгч болон сөрөг хүчнийхэн энэ хуулийг сөрөг хүчнийхэн, өөрөөр сэтгэгчдийг дарахын тулд Кремль ашигладаг Оросын хуультай ижил хэмээн буруутгаж байгаа юм. Энэ хуулийг батлавал Гүрж авторитаризм руу орж, Европтой нягт хамтын ажиллагаатай болох найдлага нь талаар болно гэж хуулийн төслийг эсэргүүцэгчид үзэж байгаа аж.

Гүржид үүссэн энэ нөхцөл байдалтай холбоотойгоор гадаад орны тэргүүнүүд ч байр сууриа илэрхийлсээр байна. Европарламентын 15 гишүүн Гүржид батлагдах гэж буй хуультай холбоотойгоор санаа зовниж байгаагаа илэрхийлсэн хамтын мэдэгдэл гаргасан бол Балтийн орнууд Гүржийн элчин сайд нарыг дуудан уулзаж, эсэргүүцлийн жагсаалд оролцогчдын эсрэг хүч хэрэглэн, хүчээр тарааж байгаад эмзэглэж байгаагаа илэрхийлсэн байна. 

Г.Бямбасүрэн