Хятадын Ардын төлөөлөгчдийн бүгд хурлын гишүүн, Жэжян мужийн эмч Чэнь Вэй хүүхдүүдэд цэцэрлэгийн наснаас нь эхлэн бэлгийн боловсрол олгох санал гаргажээ. Энэ талаар Global Times мэдээлсэн байна.
Эмчийн үзэж байгаагаар, бага наснаас нь бэлгийн боловсрол олгосноор залуус эрт бэлгийн харьцаанд орохоос сэргийлэхийн дээр бэлгийн харьцаанаас үүдэлтэй эрсдлүүд, жирэмслэлтээс сэргийлэх аргуудыг сайтар таниулах давуу талтай гэнэ.
Одоогийн байдлаар Хятадад ийм хичээл заадаг цэцэрлэг туйлын ховор, түүнчлэн зохих чиглэлийн багш нар ч байдаггүй аж. Түүнчлэн бэлгийн боловсролтой холбоотой сурах бичгүүд ч хомс гэнэ. Шинэ сурах бичиг бүтээхдээ барууны гарын авлагаас хуулалгүй, харин Хятадын нийгэм, уламжлалын онцлогт тохируулан боловсруулах ёстой гэж эмч үзэж байгаагаа илэрхийлжээ.
Түүний энэ санаачилгыг цахим орчинд эцэг эхчүүд ихээр дэмжсэн байна. Цэцэрлэгийн насанд хүүхдүүдэд биеийн онцлогыг таниулах, биеэ хэрхэн хамгаалах зэрэг суурь ойлголтуудыг өгөх хэрэгтэй гэж эцэг эхчүүд үзэж байгаа талаар эх сурвалж онцолжээ.
Г.Бямбасүрэн
| Уншиж байна |