Грект хоёр галт тэрэг мөргөлдөж, олон хүний амь насыг авч одсон эмгэнэлт хэрэг энэ долоо хоногт гарсан. Энэ ослын дараа Грекийн төмөр замын ажилчин, албан хаагчид аюулгүй байдлын систем хуучирснаас үүдэн олон хүн амиа алдсаныг эсэргүүцэж байгаагаа илэрхийлэн нэг өдрийн ажил хаялт зарлажээ. 

"Эрх чөлөө" радиогийн мэдээлснээр, галт тэрэгний ослоос үүдэн амиа алдсан хүний тоо 60-д дөхсөн байна. Төмөр замын аюулгүй байдлын систем зохих ёсоор ажиллахгүй байгаа, хэдийнэ хуучирсан гэдгийг засгийн газарт удаа дараа анхааруулсан ч ямар ч арга хэмжээ аваагүй гэж Төмөр замчдын үйлдвэрчний эвлэл эрх баригчдыг буруутгаж, улмаар нэг өдрийн ажил хаялт зарлажээ. 

Үүний зэрэгцээ, Грекийн хэд хэдэн хотод эсэргүүцэл дэгдсэн талаар ВВС агентлаг мэдээлсэн байна. Эх сурвалжийн мээдэлснээр, Грекийн төмөр замыг хариуцдаг Hellenic Train компанийн төв байрны өмнө болсон эсэргүүцлийн жагсаалын үеэр жагсагчид цагдаагийнхантай мөргөлджээ. Түүнчлэн галт тэрэгний осол болсон Лариса хот болон осолд орсон галт тэрэгний хүрэх өртөө болох Салоники хотод ч эсэргүүцэл дэгдсэн байна.

Энэ ослын улмаас Грект гурван өдрийн хугацаатай үндэсний хэмжээний гашуудал зарласан. Мөн ноцтой осолд хариуцлага хүлээж байгаагаа мэдэгдээд Тээврийн сайд огцорсон юм.

Г.Бямбасүрэн