АНУ-ын Мичиган мужийн оршин суугч эмэгтэй 15 мянган долларыг бэлнээр нь хийсэн цүнх олж, эзэнд нь өгчээ. Түүний энэ сайхан сэтгэлийг өгөөмөр шагналаар үнэлэгдсэн талаар NTD мэдээлсэн байна.

Эх сурвалжийн мэдээлснээр, Дайанна Гордон гэх эмэгтэй нэгдүгээр сарын 21-ний өдөр ажлаа тарж, гэртээ харих замдаа хооллохоор болж, шатахуун түгээх газраар оржээ. Тэрбээр дотогш орох үедээ цахилгаантай цүнх байхыг олсон байна. Цүнхийг онгойлгоход их хэмжээний мөнгө байсан гэнэ.

"Их мөнгө хараад "энэ бол минийх биш цагдаа дуудах ёстой" гэж л хамгийн түрүүнд бодогдсон" хэмээн Гордон "Фокс 2 Детроит" сувгийн сэтгүүлчид ярьжээ.

Цүнхэн дээр хэн нэгний нэр утас байгаагүй, харин хуримын ил захидлууд олдсон байна.

"Энэ ил захидлуудын ачаар цүнхэн дэх мөнгө тухайн өдөр болсон хуримын бэлэг гэдгийг бид тогтоосон" хэмээн Уайт Лейкийн цагдаагийн дэслэгч өгүүлжээ.

Гордон жилийн өмнө машин нь эвдэрсний улмаас ажилдаа очиж, гэртээ буцахдаа дөрвөн километр замыг явган туулдаг гэдгийг мэдсэн нэгэн цагдаагийн эхнэр бүсгүйд шинэ машин авч өгөхийн тулд хандивын хуудас үүсгэсэн байна.

Үүний дараа Уайт-Лейк суурингийн цагдаагийн газар ч энэ аянд Szott Automotive Group-ийн хамт нэгдэж байгаагаа илэрхийлжээ. Энэ мэдээлэл олонд хүрч, хоёрдугаар сарын 11-ний өдрийн байдлаар 82 мянган доллар цугларсан байна. Санаачилагчид анх 25 мянган доллар цуглуулахаар л төлөвлөсөн байжээ.

Ингээд түүнд шинэ машин авч өгсний дээр, машин зарсан компани машины засвар үйлчилгээг хариуцахаар болсон байна. 

Г.Бямбасүрэн