БНХАУ коронавирусийн халдварын улмаас гурван жилийн хугацаанд гадаад улс орнуудад төдийгүй дотооддоо хаалттай байсны эцэст энэ оны нэгдүгээр сард ковидын хязгаарлалтуудаа цуцалж, улсын хилээ нээсэн юм. Энэ үеэс Хятадын жуулчид бусад улс орныг, тэр дундаа Өмнөд Солонгос, Японыг ихээр зорих болсон.

Хатуу хязгаарлалтаа огцом сулруулсны дараа дотоодод нь халдвар эрчимтэй тархаж байгаа үед Хятад хилээ нээсэн нь бусад улс орнуудын болгоомжлолыг төрүүлж, Хятадаас ирэх жуулчдаас ковидын шинжилгээ авахаар болж байв. Ийм журам гаргасан орнуудын нэг нь Өмнөд Солонгос байсан юм. Гэхдээ энэ улс хятад жуулчдаас зайлшгүй шинжилгээ авах журмаа цуцлахаар болжээ. 

KBS телевизийн мэдээлснээр Хятадаас Бүгд Найрамдах Солонгос Улс руу ирж буй зорчигчдоос коронавирусийн шинжилгээ зайлшгүй авах журмыг өнөөдрөөс буюу гуравдугаар сарын нэгний лхагва гарагаас эхлэн цуцалсан байна. Өмнө нь Хятадаас богино хугацааны визтэй ирж буй зорчигчид PCR шинжилгээ өгч, нисэх буудал дээр шинжилгээний хариу хүлээх шаардлагатай байсан юм. 

Түүнчлэн гуравдугаар сарын нэгний өдрөөс эхлэн Хятадаас ирэх нислэгүүдийг Өмнөд Солонгосын бүх олон улсын нисэх буудал хүлээн авахаар болжээ. Өмнөд Солонгосын нисэх буудал дээр шинжилгээ авах журам цуцлагдсан ч Хятадаас нисэхээс өмнө шинжилгээ өгч, бүртгүүлдэг журам гуравдугаар сарын 10 хүртэл үйлчлэх юм байна. 

Г.Бямбасүрэн