Данид XVII зуунаас эхлэн тэмдэглэж буй Аугаа мөргөлийн өдрийн улсын баяр гэсэн статусыг цуцлах шийдвэрийг тус улсын парламент гаргажээ. Энэ талаар DW агентлаг мэдээлсэн байна. Эх сурвалжийн мэдээлснээр, хоёрдугаар сарын 28-ны өдөр болсон хуралдаанаар Аугаа мөргөлийн өдрийг улсын баяр гэж үзэхгүй байх тухай асуудлаар санал хураахад 98 гишүүн дэмжсэн байна.

Энэ санаачилгыг Данийн Ерөнхий сайд Метте Фредериксений засгийн газар гаргасан бөгөөд энэ нь Данийн батлан хамгаалахын төсвийн санхүүжилтийг нэмэгдүүлэх зорилготой аж. Сайд нарын танхимын тооцоолсноор, улсын баяр тэмдэглэлгүй, ажлын нэмэлт нэг өдрийг гаргаснаар төрийн санд 400 сая орчим еврогийн орлого орох юм байна. Улсын баяр тэмдэглэхгүйгээр нийтээрээ ажиллаж олсон энэ орлогыг НАТО-оос тавьсан, батлан хамгаалахын санхүүжилтийг ДНБ-ийн хоёр хувьд хүргэх шаардлагыг биелүүлэхэдп зарцуулах аж. 

"Нэг өдөр илүү ажиллах нь ямар ч хүндрэлгүй" гэж Засгийн газрын тэргүүн онцлоод, батлан хамгаалах, аюулгүй байдал, эрүүл мэнд зэрэг салбаруудад асар их зардал шаардлагатай байгааг цохон тэмдэглэсэн байна.

Харин ийнхүү улсын баярыг цуцлах шийдвэр гаргасныг үйлдвэрчний эвлэлүүд эсэргүүцжээ. Тодруулбал, Данийн Үйлдвэрчний эвлэлүүдийн холбоо эсэргүүцлийн өргөх бичиг үйлдэж, 470 000 гаруй гарын үсэг цуглуулсны дээр олон нийтийн санал асуулга явуулахыг уриалсан байна. 

Энд дуулгахад, Аугаа мөргөлийн өдрийг Данид Улаан өндөгний баяраас хойш дөрөв дэх баасан гарагт тэмдэглэдэг бөгөөд энэ жил тавдугаар сарын тавны өдөр таарч байгаа аж. Энэ өдрийг 1686 онд V Кристиан хааны зарлигаар үндэсний баяр болгож байв. 

Г.Бямбасүрэн