Хоёрдугаар сарын зургаанд Туркэд хүчтэй газар хөдлөлт болсны улмаас олон мянган барилга байшин нурж, амиа алдсан хүний тоо 44 мянгыг давсан юм. Энэ байгалийн гамшгаас үүдсэн хохирлыг Дэлхийн банк тооцоолжээ.

Дэлхийн банкны тооцоолсноор, хоёрдугаар сарын зургааны өдөр болсон хоёр газар хөдлөлтийн улмаас учирсан бодит хохирлын хэмжээ 34,2 тэрбум ам.доллар аж. Энэ нь Туркийн 2021 оны ДНБ-ий дөрвөн хувьтай тэнцэх юм.

Дэлхийн банкны тайланд өгүүлснээр, орон сууцны барилгад учирсан шууд хохирлын хэмжээ 18 тэрбум доллараар үнэлэгдэж байгаа юм байна. Газар хөдлөлтийн улмаас эдийн засгийн үйл ажиллагаа зогссон, хөдөө аж ахуй, хөдөлмөрийн зах зээлд үзүүлэх нөлөө, эрэн хайх, аврах ажиллагааны зардал зэргийг тооцвол шууд хохирлын хэмжээ хоёр дахин өснө гэж Дэлхийн банкны мэргэжилтнүүд онцолжээ. Түүнчлэн байгалийн гамшгийн улмаас Туркэд 1 250 000 хүн орон гэргүй болсон гэж тайланд өгүүлсэн байна. 

Г.Бямбасүрэн