Оросын цэргүүд Украины эзлэгдсэн нутгууд дээр эрчүүд, эмэгтэйчүүд, охидын эсрэг бэлгийн хүчирхийлэл үйлдсэн олон арван тохиолдол гарсан гэж НҮБ-ын Ерөнхий нарийн бичгийн дарга мэдэгджээ. Тэрбээр Женевт болсон Хүний эрхийн зөвлөлийн жил бүрийн хурал дээр ийм мэдэгдэл хийсэн талаар Ройтерс мэдээллээ.

Гутерришийн онцолсноор, Оросын цэргүүд бэлгийн хүчирхийлэл үйлдсэн тохиолдол бүгд баримтаар батлагдаж байгаа аж. Оросын түрэмгийлэл "хүний эрхийг хамгийн ихээр зөрчсөн", "хүн ам олноор амиа алдаж, дүрвэж зугтахаас аргагүй байдалд хүргэсэн" гэж Гутерриш мэдэгджээ. 

Хүний эрхийн зөвлөлийн энэ удаагийн чуулган дээр Оросын цэргүүд Украин руу довтолсноос хойш үйлдэгдсэн цэргийн гэмт хэргүүдийг мөрдөн шалгах асуудлыг хэлэлцэж байгаа юм. Энэ чуулган урьд өмнөхөөс удаан буюу хоёрдугаар сарын 27-ноос дөрөвдүгээр сарын дөрвөн хүртэл зургаан долоо хоног үргэлжилнэ.

Энд дуулгахад, 2023 оны нэгдүгээр сарын эхээр Нью-Йорк Таймс сонин нийтлэсэн материалд эзлэгдсэн нутгууд дээр Украины эмэгтэйчүүдийг хүчирхийлсэн талаар өгүүлж байв. Сонины бичсэнээр, Оросын командлагчид цэргүүд нь эмэгтэйчүүдийг хүчирхийлж байгаа талаар мэдсэн, улмаар өөгшүүлж байсан гэнэ. 

Г.Бямбасүрэн