Оросын Ерөнхийлөгч Владимир Путиний дэглэмийг эсэргүүцдэг байсан улс төрч Борис Немцов одоогоос найман жилийн өмнө, 2015 оны хоёрдугаар сарын 27-ны үдэш Москва хотод бусдын гарт амиа алдсан юм. Түүний дурсгалыг хүндэтгэх арга хэмжээ даваа гарагт Оросын олон хотод болж өнгөрчээ. 

"Эрх чөлөө" радиогийн мэдээлснээр, Немцов амиа алдсан гүүрэн дээр жил бүр иргэд цэцэг тавьж, дурсгалыг хүндэтгэдэг болсон байна. Улмаар даваа гарагт ч мөн энэ газарт цэцэг, лаа авчирж тавьжээ. Казань, Пермь, Екатеринбург, Новосибирск хотуудад ч Немцовын дурсгалыг хүндэтгэх арга хэмжээ зохион байгуулсан байна. Энэ үеэр дайн эсэргүүцсэн зураг хуудас барьсан хэд хэдэн хүн саатуулагдсан талаар Сота мэдээлжээ. 

Иргэд Немцовын дурсгалыг хүндэтгэхийн зэрэгцээ улс төрийн хэлмэгдүүлэлтийг эсэргүүцсэн цуглаан ч болсон байна. Тодруулбал, Барнаул хотын захиргаа зөвшөөрснөөр "Яблоко" намынхан Эрх чөлөний талбай дээр улс төрийн хэлмэгдүүлэлтийн хохирогчдын хөшөөний урд жагсаал зохион байгуулжээ. 

Энд дуулгахад, Оросын улс төрч Борис Немцов 2015 оны хоёрдугаар сарын 27-ны үдэш Кремлээс зуугаад метрийн зайтай гүүрэн дээр явж байх үедээ бусдын гарт амиа алдсан юм. Энэ хэрэгт Чеченийн хүчний байгууллагуудын офицер зэрэг таван хүнийг гэм буруутай хэмээн шүүх үзэж, олон жилийн хорих ял оноосон юм. Гардан гүйцэтгэсэн хүмүүс ял авсан ч захиалагч нь өнөө хэр тодорхойгүй байгаа. Немцовын хамтран зүтгэгчид мөрдөн шалгалтын явцыг шүүмжилж, Чечень эсвэл Оросын удирдлага Немцовын үхэлд буруутай хэмээн үздэг. 

Г.Бямбасүрэн