Дэлхийн хамгийн аюулгүй хотуудын тоонд ордог Хонконгт аймшигт хэрэг гарчээ. The Guardian сонины мэдээлснээр, Хонконгийн цагдаагийнхан хотын захын нэгэн байрнаас 28 настай загвар өмсөгч, инфлүнсер Эбби Чойгийн мөчилсөн цогцосыг олсон байна.
Эбби Чой сураггүй болсон талаар бүсгүйн ар гэрийнхэн лхагва гарагт цагдаагийнханд мэдээлжээ. Улмаар цагдаагийнхан эрлийн ажиллагааг эхлүүлж, баасан гарагт аймшигт хэргийг илрүүлсэн байна.
Цагдаагийнхан сэжигтний түрээсэлсэн байранд очиж, үзлэг хийхэд хөргөгчинд хүний хөл, харин гал тогоонд нь хүний мах чанасан хоёр сав байсан гэнэ. Харин цогцосны толгой олдоогүй байгаа аж. Түүнчлэн энэ байрнаас цахилгаан хөрөө, махны машин, урт цув, бээлий, амны хаалт зэрэг олдсон байна. Түрээсийн байранд тавилга байгаагүй, ханыг бүхэлд нь брезентээр бүтээсэн байх бөгөөд цогцосыг мөчлөх үед ул мөр үлдээхгүй зорилгоор ханыг ийнхүү бүрсэн байх гэж цагдаагийнхан өгүүлжээ.
Энэ хэрэгт Эббигийн салсан нөхрийн гэр бүлийнхэн холбоотой нь тогтоогдсон байна. Цагдаагийнхан Эббигийн хуучин нөхрийн эцэг, түүнчлэн нөхрийнх нь ахыг баривчилжээ. Харин хуучин нөхөр нь хэргийн газраас оргон зайлсан байсан бөгөөд бямба гарагт Лантау арал дээр хөлөг онгоцонд суух гэж байхад нь баривчилсан байна.
Эббиг хөнөөх болсон сэдэл нь эхнэр, нөхрийн хоорондын санхүүгийн маргаан байсан байж болзошгүй гэж цагдаагийнхан таамаглаж байгаа аж. Тэд дундаасаа хоёр хүүхэдтэй болсон байсан гэнэ. Бүсгүйн хадмууд Эббиг хөрөнгөө захиран зарцуулж байгаад нь ихэд дургүйлхдэг байсан гэнэ.
| Уншиж байна |