Испанид 16-аас дээш насныхан эмнэлгийн дүгнэлтгүйгээр бичиг баримт дээрээ хүйсээ солиулах боломжийг олгосон хууль баталжээ. Энэ талаар ВВС агентлаг мэдээлсэн байна. 

Эх сурвалжийн мэдээлснээр, хүйсээ солих журмыг хялбаршуулах энэ хуулийн төслийг удаан хэлэлцсэний дүнд 191 гишүүн дэмжиж, 60 гишүүн татгалзсанаар хууль батлагджээ. 

Үүнээс өмнө Испанид бичиг баримт дээрх "хүйс" гэсэн хэсэгт заасан хүйсээ солиулахын тулд эмнэлгийн дүгнэлт авах, хоёр жил гормоны эмчилгээ хийлгэж, дараа нь магадлагаа авах шаардлагатай байсан юм. Харин шинэ хууль батлагдсанаар олон дамжлага дамжих шаардлагагүй болжээ.

Шинэ хуульд зааснаар, хүйсээ солих хүсэлтэй хүмүүс орон нутгийн захиргааны байгууллагад өргөдөл гаргаж, гурван сарын дараа өргөдлөө баталгаажуулах ёстой аж. Харин 12-13 настай өсвөр насныхны хувьд шүүхийн тогтоол шаардлагатай, 14-15 насныхны хувьд эцэг эх эсвэл хууль ёсны асран хамгаалагчдынх нь зөвшөөрөл байхад хангалттай гэнэ.

Энэ хуулийг хэлэлцэхээс өмнө Испанийн Тэгш эрхийн асуудал эрхэлсэн сайд Ирене Монтеро "Транс хүмүүс бол өвчинтэй биш, тэд энгийн л хүмүүс" хэмээн онцолжээ.

Гэвч тус улсад энэ хуулийг эсэргүүцэгчид олон байгаа юм. Пүрэв гарагт конгресс хуралдах үеэр конгрессын ордны өмнө хуулийг эсэргүүцсэн олон нийтийн жагсаал болсон байна.

Г.Бямбасүрэн