Украины эсрэг өргөн цар хүрээтэй түрэмгийлэл үйлдэхдээ Оросын Ерөнхийлөгч Владимир Путиний тооцоолсон бүхэн нь алдсан гэж АНУ-ын Батлан хамгаалахын сайд Ллойд Остин мэдэгджээ. Тэрбээр "Рамштайн" форматаар болсон хурлын дүнгээр хийсэн хэвлэлийн бага хурлын үеэр ийнхүү мэдэгдсэн байна.

"Путин Украиныг хялбархан бай болно гэж жилийн өмнө бодож байсан. Киев амархан сөхөрч унан, харин дэлхий нийт өөрийг нь дэмжинэ гэж тооцоолсон ч Кремль бүхий л тооцоолол дээрээ алдлаа" хэмээн Америкийн Батлан хамгаалахын сайд мэдэгджээ.

Тэрбээр хэвлэлийн бага хурал дээр мэдэгдэл хийхдээ Украины цэргүүд жилийн туршид эх орныхоо төлөө эрэлхэгээр тулалдаж, Украины ард түмэн Оросын түрэмгийллийн үед эр зориг гаргаж, харин дэлхийн улс орнууд нэгдсэн гэдгийг онцолсон байна.

"Маргааныг тайван замаар зохицуулдаг, тусгаар тогтнол, хил хязгаарыг хүндэтгэдэг, хүн амыг хамгаалдаг дэлхийд амьдрахын тулд бид хамтдаа хичээж байна. Манай холбооны бүлэг ч ийм үнэт зүйлсийг дэмждэг" хэмээн Остин мэдэгджээ.

Түүнчлэн "Рамштайн" форматын гишүүн орнууд эрх чөлөөний төлөөх Украины тэмцлийг дэмжихээр нэгдсэн гэдгийг АНУ-ын Батлан хамгаалахын сайд онцолсон байна.

"Бид шаардлагатай бол хамтдаа нэгдэн, тусласаар байна" хэмээн Ллойд Остин мэдэгджээ.

Энд дуулгахад, "Рамштайн" форматаар Украины асуудлыг хэлэлцэх холбооны бүлгийн есдүгээр хурал хоёрдугаар сарын 14-ний өдөр болсон юм. Энэ бүлгэмийн гишүүд Украинд шинэ агаараас эсэргүүцэн хамгаалах системүүд, зэр зэвсэг нийлүүлэхийн дээр санхүүжилт олгохоор тохиролцсон байна.

Г.Бямбасүрэн