Канадын Гадаад хэргийн яам иргэддээ хандан Беларусь улс руу зорчихтой холбоотой сэрэмжлүүлэг гаргажээ. Энэ талаар ABC News агентлаг дамжуулсан байна. 

Тодруулбал, Канадын Гадаад хэргийн яам иргэдээ Беларусь руу зорчихгүй байх, энэ улсад байгаа бол нэн даруй орхин гарахыг зөвлөжээ. Энэ нь Орос, Украины сөргөлдөөнтэй холбоотой хэмээн Гадаад хэргийн яам тайлбарласны дээр Беларусьт Канадын төрийн байгууллага байхгүй, Польш дахь Канадын элчин сайдын яам Беларусьт байгаа иргэддээ консулын үйлчилгээ үзүүлэх боломж хомс гэдгийг анхааруулсан байна. 

"Орон нутгийн хуулийг мушгин гуйвуулж ашиглах, Орос, Украины сөргөлдөөн даамжрах эрсдэл өндөр байгаа тул Беларусь руу аливаа байдлаар зорчихоос зайлсхийгээрэй. Та бүхэн Беларусьт байгаа бол өөрсдөө зардлаа гарган энэ улсаас явсан нь зүйтэй" хэмээн Канадын Гадаад хэргийн яамны мэдэгдэлд өгүүлжээ.

Үүнээс өмнө, Францын Гадаад хэргийн яам иргэдээ Беларусийг нэн адруй орхин гарахыг уриалсан юм. Түүнчлэн Орос дахь АНУ-ын Элчин сайдын яам "хууль бус баривчилгаа, шинээр дайчилгаа зарлагдаж болзошгүй тул" нэн даруй Оросоос явахыг иргэддээ хандан уриалж байв.

Г.Бямбасүрэн