Турк, Сирийн газар хөдлөлтийн улмаас гэмтсэн хүмүүст цус хандивлах ажлыг Газын зурваст зохион байгуулжээ. Түүнчлэн Газын зурвасын оршин суугчид байгалийн гамшигт хохирсон хүмүүстэй эв санаа нэгтэй байгаагаа илэрхийлэн жагсаал зохион байгуулсан талаар Анадолу агентлаг мэдээлсэн байна. 

Эх сурвалжийн мэдээлснээр, жагсаалд оролцогчид "Манай ах дүүс Турк, Сирид байна. Та нарын зовлон бидний зовлон. Бидний цус ч та нарынх" гэсэн зурагт хуудас барин алхжээ. Энэ арга хэмжээг "Өнчин хүүхдүүдэд итгэл өгөх хүрээлэн" нэртэй Палестины төрийн бус байгууллагын санаачилгаар зохион байгуулсан байна. Төрийн бус байгууллагын байран дээр Турк, Сирийн далбааг мөн мандуулжээ. 

Сайн дурынхан жагсаал зохион байгуулахын дээр цусаа хандивласан байна. Олон мянган хүн газар хөдлөлтийн улмаас гэмтэж бэртэн, эмнэлэгт эмчлүүлж байгаа энэ үед цус нэн шаардлагатай гэж үзсэн сайн дурынхан ийнхүү цус хандивлах ажлыг зохион байгуулжээ.

Г.Бямбасүрэн