АН-аас Ерөнхийлөгч У.Хүрэлсүхэнд хандаж буй талаараа өнөөдөр /2022.11.15/ мэдээлэл хийлээ. Тус намаас 2023 оны төсөвт бүхэлд нь хориг тавих хүсэлтийг Ерөнхийлөгчид хүргүүлж байна.

УИХ-ын гишүүн Д.Ганбат “Сүүлийн зургаан жилд байнга алдагдалтай төсөв баталж байна. Зургаан төслийн өмнөхтэй харьцуулвал  Монгол Улсын төсөв гурав дахин нэмэгджээ. Монголын ард түмний амьдрал гурав дахин сайжирсан уу гэвэл үгүй. Харин хоёр дахин уналаа. Өмнө нь гурван хүний нэг нь ядуу байдаг байсан бол одоо хоёр хүний нэг нь ядуу байна. Энэ байдал 2023 онд үргэлжлэх нь тодорхой байна.

Маш их үрэлгэн төсөв баталлаа. 19 их наяд 50 тэрбум төгрөгийн орлоготой, 20 их наяд 475 тэрбум төгрөгийн зарлагатай төсөв баталлаа. Үүний алдагдал нь 1.4 их наяд төгрөг болж байна. Хаалга барих, хөшөө босгох төсөв боллоо. Ард түмний амьдралыг сайжруулах, тэтгэвэр, эмч сувилагч, төрийн албан хаагчдын цалинг нэмэх заалт байхгүй” хэмээн мэдэгдэж,  2023 оны төсөвт хориг тавих хүсэлтийг Ерөнхийлөгчид хүргүүлж байгаагаа илэрхийллээ.

АН-ын дарга С.Эрдэнэ: Монгол Улсын төсөв шаардлага хангасан түвшинд батлагдсангүй. Тиймээс энэ төсөвт хориг тавьж, буцаан татуулж, улс орны нийгэм, эдийн засгийн бодит байдалд буусан төсөв болгон батлах нь зүйтэй.

АН-аас Ерөнхийлөгчид хүргүүлж буй саналд:

...Төсвийн зарлага дэндүү данхайж, жил ирэх тусам 20 хувиар өсөж байна. Гэтэл манай улсын эдийн засагт энэ хэмжээний өсөлт гарсангүй. ДНБ 12-14 тэрбум ам.долларт эргэлдэж, төрийн үйлчилгээний чанар сайжирсангүй. Үнэ өсөж, ханш сулрахтай зэрэгцэн иргэдийн амьдрал уруудаж, нэг иргэнд ногдох ДНБ-ий хэмжээ 4000 ам.долларт уяатай 10 жил өнгөрлөө.

Төсвийн зарлага 2018 онд 9.6 их наяд байсан бол ирэх жил 20.5 их наяд болж тэлжээ. Урсгал зардал нь 7 их наядаас 15 их наяд төгрөг болж нэмэгдлээ. Урсгал зардал өсөхийн хэрээр төсвийн алдагдал нэмэгдэж, үүнийгээ гадаадын зээлээр хаахаар болж байна хэмээн Ерөнхийлөгчийг бүрэн эрхээ хэрэгжүүлэхийг шаардлаа.