Ардчилсан намын бүлэг хуваарийн дагуу  хуралдаж, зарим асуудлаар байр сууриа нэгтгэжээ. Өнөөдрийн бүлгийн хуралдаанаар гурван асуудал хэлэлцсэн байна. 

Тус намын бүлэг долоо хоног бүрийн даваа гарагт МАН-ын 2020 оны сонгуульд оролцохдоо дэвшүүлсэн мөрийн хөтөлбөрийн зүйл заалтыг сануулах акцыг зохион байгуулж байгаа. Өнөөдрийн бүлгийн хуралдаанаар эрх баригч хүчин 2020 оны сонгуулийн мөрийн хөтөлбөртөө Засаглалын хувьд хэрхэн хөгжих тухай ямар заалтыг тусгасан, хэрхэн хэрэгжиж байгаа талаар авч хэлэлцсэн байна. Мөн Засгийн газарт албан шаардлага хүргүүлэхээр байр сууриа нэгтгэжээ.

Өнөөдрийн бүлгийн хуралдаанаар хэлэлцсэн асуудлын талаар АН-ын бүлгийн дарга О.Цогтгэрэл "Монгол Улсын эдийн засгийн 40 хувь нь төсвөөр дамжин хязгаарлагдаж байна. Үүн дээр нэмэгдээд ТӨК-иудын борлуулалтын орлого 55 их наяд болсон. Ингэснээр МУ асар их төржсөн улс болж байна. Үүний цаана авлига хээл хахуулийн асуудал гарч байна. Энэ удаад нүүрсний хэрэгтэй холбоотой долоон зүйл заалт бүхий албан шаардлагыг Засгийн газарт хүргүүлж байна. Зүйл заалт бүрээр намын бүлэг саналаа нэтгэсэн" гэлээ. 

Мөн өнөөдрийн мэдээллийн үеэр Улаанбаатар-Дархан чиглэлийн зам барилгын ажил эхэлснээс хойш 173 хүн нас барж, 206 хүн хүнд гэмтсэн гэсэн тоо баримт байгааг С.Одонтуяа гишүүн мэдээллээ. Түүний зүгээс энэ мэдээлэл Засгийн газар бүрэн бүрэлдэхүүнээрээ огцрох хэмжээний асуудал учраас байнга сануулах шаардлагтайг онцоллоо. 

П.ГОО