Мягмар гарагт Э.Одбаяр нарт холбогдох хэргийн шүүх хуралдаан болж, тэдэнд 1-1.2 жилийн хугацаагаар зорчих эрхийг хязгаарлах ялаар тогтоож шийдвэрлэсэн юм. 

Шүүхээс оршин суугаа газар болох Баянгол дүүргийн нутаг дэвсгэрээс 1  жилийн хугацаанд гарахыг хориглох зорчих эрхийг хязгаарлах ял авсан Л.Ганхөлөг өнөөдөр Төрийн ордонд мэдээлэл хийлээ. Түүний зүгээс "Миний бие дайнгүй дэлхийн тухай уриалсан залуусын нэг. Үүнийхээ төлөө ялтан болоод шүүхийн шийдвэр уншуулсан. 13 сарын турш биднийг яллахын тулд хууль хүчнийхэн, эрх баригч намынхан бүх хүчээ хаяж зүтгэлээ. Зөвлөх өмгөөлөгч гэдэг хүнийг шүүх хуралдаанд оруулж хяналтаа тавьсан. Шүүх хуралдааны шийдвэр гарснаас хойш МАН-ын генсек, ЗГХЭГ-ын дарга Д.Амарбаясгалан шүүх хуралд маш их өндөр ач холбогдол өгч, шүүх хурал хэрхэн явагдаж байгааг хянаж ажиглаж сууснаа нотолж маш яаран жиргээнд өөрийн постоо оруулсан.

Өчигдрөөс эхлээд ХЗДХ-ийн сайд Х.Нямбаатар энэ асуудалд Засгийн газар, эрх баригч хүчин ямар ч холбоогүй мэтээр тайлбарлаж, тайлбараа хийхдээ "Эдгээр иргэдэд үг хэлж үзэл бодлоо илэрхийлж, дайныг эсэргүүцсэнийх нь төлөө ял өгөөгүй" гэх утга агуулга бүхий мэдэгдэл хийсэн. Үг хэлж үзэл бодлоо илэрхийлж, дайныг нь эсэргүүцсэн гэж яллаагүй боловч зорилго чиглэл нь үгээ хэлэх боломжийг, дайныг эсэргүүцэх, эрх баригчдыг шүүмжлэх боломжийг хаах шүү дээ. Энэ бол бидний амыг нь хамхихын төлөө хийж байгаа улстөрийн захиалгатай үйлдэл. Шүүхээс үг хэлж үзэж бодлоо илэрхийлснийхээ төлөө ялалж байгааг дэлхий нийт харж байгаа. Тар нар шившиг болсон. Л.Оюун-Эрдэнэ, Д.Амарбаясгалан, Х.Нямбаатар нар ДЭЛХИЙН шившиг болсон. Бидний таван залуус давж заалдаж, хийсэн хэрэг байхгүй гэдгээ нотолно" гэлээ. 

П.ГОО