УИХ-ын чуулганы нэгдсэн хуралдаан эхэллээ. Хуралдааны эхэнд УИХ-ын гишүүн Б.Пүрэвдорж асуудал нэмэх горимын санал гаргаж, үг хэллээ.

Тэрбээр “Тэтгэврийг 7 биш 5 тогтоо гэсэн жагсаал хийж, УИХ-ын гишүүд оролцлоо. Энэ жагсаалын дараа олон гишүүд хамтдаа байгаагаа илэрхийллээ. Зарим нь ахмадуудыг ашиглалаа гэж тоомжиргүй хандаж байна.

Маш сайхан жагсаал болж, Монголын ард түмэн төрдөө хүндэтгэлтэй ханддагийг харуулсан. Монголын ахмадууд төрдөө итгэж, хамгийн сайн сайхан зүйлийг бидний төлөө хийнэ гэж найддаг хүмүүсийн цуглаан болсон.

Хэрвээ ирэх долоо хоногийн хэлэлцэх асуудлын дараалалд оруулахгүй бол Баянхонгор аймгаас эхлээд жагсаал зохион байгуулна. Энэ хуулийг батлуулахын төлөө эцсээ хүртэл явна.

Монголын түүхэнд анх удаа хууль батлуулахын төлөө, хамгийн соёлтой, сайн сайхныг хүссэн жагсаал болсон. Тэтгэвэрт гарсан настай хүмүүс тэтгэвэр амьдралд хүрэхгүй байгааг ярьж байна. Ирэх жилийн төсөв баталж байгаа энэ үед иргэдийн тэтгэврийг нэмэгдүүлэх онцгой шийдвэр гаргана гэдэгт итгэж байна. УИХ-ын даргаас нийгмийн даатгалын сангаас тэтгэвэр тэтгэмж олгох хуулийн төсөлд өөрчлөлт оруулах ажлын хэсгийг хуралдааныг тов дараалалд оруулж өгөөч гэж хүсэж байна" гэсэн санал гаргалаа.