УИХ-ын чуулганы өнөөдрийн хуралдаан эхэллээ. Хуралдааны эхэнд өнөөдрийн хэлэлцэх асуудалтай холбогдуулан УИХ-ын гишүүн Ц.Даваасүрэн санал гаргалаа. 

Тэрбээр "2023 оны төсвийн тухай хуулийг дагасан хуулиуд дотор Хөгжлийн банкны гадаад зээлийн өрийг төр баталгаа гаргаж төлөх заалт байна. Б.Жавхлан чи, энэ заалтаа татаж ав. Чи хамгийн их Хөгжлийн банкыг үймүүлсэн. Чиний менежер Мөнхбаяр Зээлийн газрын дарга, танил хүүхэн Уянга чинь Зээлийн санхүүжилтийн хэлтсийн захирал хийсэн, Пүрэвсүрэн чинь DBN лизенгийн захирал хийсэн. Тэгээд Хөгжлийн банкны 40 гаруй тэрбум төгрөгийг  хадгаламж байршуулсан /Батхүү захиралтай, авгайгийнх нь эзэмшдэг компанид хамтран эзэмшдэг/. Үүнийг хэн төлөх вэ? Чи хаана мөнгө, хаана банк, хаана сан байна тэр лүү гар дүрж байна.

Арилжааны банкны зээлийн хүүгийн зөрүүнд олгодог 60 гаруй тэрбум төгрөг хэрхэн зарцуулагдаж байгааг шалгах хэрэгтэй. Зээлээр мэргэшсэн хүн Сангийн сайд хийгээд бүх сан, бүх банк руу луйвар хийж байна. Худлаа гэвэл чи намайг УИХ-ын Ёс байнгын хороонд өгөөрэй. Үүнийг Түр хороо шалгах хэрэгтэй. Хөгжлийн банкны зээлд төр баталгаа гаргаж болохгүй. Энэ хуулийг өчигдөр байнгын хорооны хуралдаанаар хэлэлцсэн.

Гэтэл 30 гаруй тэрбумыг авсан Г.Амартүвшин зэрэг хүмүүс "Төрийн баталгаа гаргаад зээлийг төлнө" гээд сууж байгаа байхгүй юу, гөлийчихөөд. Ичихгүй. Чи УИХ-аас татгалзаад шалгуулна гэсэн яасан бэ? Шалгуулаарай чи. Чамд УИХ-д суух эрх байхгүй шүү. Хөгжлийн банкны гадаад зээлийн өрийг төр төлөхтэй холбоотой тогтоолын төсөл хэлэлцэхэд Г.Амартүвшин мэтийн 10 гаруй гишүүн оролцож болохгүй шүү. Ашиг сонирхлын зөрчилтэй гэж үзнэ. Г.Амартүвшин чи зээл авсан чинь худлаа юу?  Төрийн эрх барих дээд байгууллагад улстөрчдийн авсан зээлийг төр баталгаа гаргаж төлөх тухай яриад байж болох юм уу?" хэмээн бухимдлаа. 

П.ГОО