Өнөөдөр өглөө нийгмийн сүлжээнд Сүхбаатар дүүргийн 9 хороонд байрлах Цагаан байрны замын эсрэг талын халаалтгүй чингэлэгт хүүхдүүд орхисон тухай мэдээлэл тархсан. 

Тэгвэл мэдээллийн мөрөөр Чингэлтэй дүүргийн Гэр бүл хүүхэд залуучуудын хөгжлийн хэлтсийн ажилтнууд ажиллаж, хүүхдүүдийн ээжээс тайлбар авчээ. 

Зурагтай холбогдуулан хүүхдийн ээж "Миний хувьд Сүхбаатар дүүргийн 9 хороонд байрлах Цагаан байрны замын эсрэг талын ТҮЦ-д ажилладаг. Тухайн үед хүүхэд харах хүнгүй байсан учир анх удаа ажил дээрээ хүүхдүүдээ авчирсан. Архи дарсны асуудал байгаагүй. Бие засах хооронд авсан зураг" хэмээн тайлбар өгчээ. 

Энэ талаар Чингэлтэй дүүргийн Гэр бүл хүүхэд залуучуудын хөгжлийн хэлтсээс тодруулахад " Манай байгууллага цагдаагийн байгууллагатай хамтран ажилласан. Ээж болон хүүхдүүдтэй уулзсан. Хүүхдүүдийн бие ил шарх сорвигүй биеийн байдал хэвийн байсан. ТҮЦ-ийн ойр байрлах нийтийн байранд амьдардаг юм байна. Тухайн ээжид хууль сануулах үйлчилгээ үзүүлсэн. Хүүхдүүдийг дахиж ажлын байранд авчрахгүй хараа хяналтгүй үлдээхгүй байхыг санууллаа" гэлээ. 

Уг асуудлыг Сүхбаатар дүүргийн цагдаагийн хэлтсээс үргэлжлүүлэн шалгах ажиллагаа үргэлж байгаа аж. Мөн хүүхдүүдийн зураг цахим орчинд тархсан үйл явцад ээжийнх зүгээс шүүмжлэлтэй хандаж байгаагаа илэрхийлсэн байна. Иймээс хуулийн дагуу мэдээлэл түгээгчид гомдол гаргах эрх зүйн зохицуулалт байгааг зөвлөсөн байна.

П.ГОО