УИХ-ын гишүүн Б.Баттөмөр өнөөдрийн байнгын хорооны хуралдааны үеэр Төрийн албан хаагчдын мэргэжлийн ур чадвар хангалтгүй байгаа талаар хатуухан шүүмжлэл хэллээ. 

Тэрбээр "Төрийн албаны зөвлөлийн төсөв 1,1 тэрбум төгрөгөөр нэмэгдсэн байна. Төсөв өсөж байгаатай ярих юмгүй. Гэхдээ өнөөдрийн Монгол Улсын хөгжлийн мухардал Монгол хүмүүсээс үүдэлтэй гэдэг анхаарах хэрэгтэй. Төрд бэлтгэгдээгүй, мэргэжлийн бус хүмүүс төрийн ажил хийх гэж оролддог. Мэргэжлийн бус хүмүүсээс мэргэжлийн бус шийдвэр л гардаг. Мэдлэг чадварын хомсдол үүсдэг. Англи хэлний багахан яриатай болсон хүмүүс өөрийгөө англи хэлтэй гэдэг ч бичиж, уншиж, ойлгож чаддаггүй. Тэд л төрийн ажил нурааж байна. Монголын ажил англи биш Монгол хэл дээр явагдана. Монгол төрийн нэр хүндийг эдгээр хүмүүс унагаж байна. Энэ асуудлыг хэрхэн шийдэх ёстой вэ, Б.Баатарзориг дарга аа. Ковидын хуулиар 1300-аад хүнийг шууд томилсон. Энэ байдлаар яваад байх юм уу? Асуудал дээрээсээ байгаад дүгнэлт хийх шаардлагатай. Мөн төрийн албан хаагчид Улаанбаатарт ирж сургалтад хамрагддаг болсон байна. Сургалтуудыг дан цахимаар хийх хэрэгтэй, зардал бага. Цахим, дижитал ертөнцөд амьдарч байгаагийнх энэ мэтээр зардал хэмнэх хэрэгтэй" гэлээ.