Үйлдвэржилтийн байнгын хороо Эрдэнэт үйлдвэрийн технологид таарахгүй хүдрийн овоолгыг хэрхэн ашиглах тухай тогтоолын төслийг хэлэлцэж эхэллээ. Энэ тогтоолыг төслийг 04 дүгээр сард УИХ-ын гишүүн Н.Алтанхуяг өргөн барьсан юм. Энэ талаар УИХ-ын гишүүн Н.Алтанхуяг өнөөдөр /2022.10.25/ мэдээлэл хийлээ.

Эрдэнэт үйлдвэрийн технологид тохирохгүй агуулга нь бага болон исэлдсэн хоёр төрлийн хүдрийг тусгайлан овоолдог. Одоогоор энэ овоолгыг хоёр үйлдвэр боловсруулж, цэвэр зэс гаргаж байна. Тус удахгүй “Зэс эрдэнийн хувь” үйлдвэр ашиглалтад орсноор овоолгоос гурван үйлдвэр жилд 22 500 тонн цэвэр зэс үйлдвэрлэх боломж бий болно. 

Харин энэ үйлдвэрүүд нь Орхон аймагт болон Эрдэнэт хотын иргэд ямар ч хүртээлгүй. Зарим нь бүр Эрдэнэт үйлдвэрт ч хүртээлгүй болчихоод байгаа. Тиймээс овоолго боловсруулдаг үйлдвэрүүдийн ашгийн 34 хувийг Эрдэнэт үйлдвэр, 33 хувийг Орхон аймаг, 33 хувийг Эрдэнэтийн иргэдэд эзэмшүүлэх УИХ-ын тогтоолын төсөл өргөн барьснаа УИХ-ын гишүүн Н.Алтанхуяг тайлбарлалаа.

Овоолго боловсруулдаг үйлдвэрүүд жилд 300 орчим тэрбум төгрөгийн ашигтай ажилладаг байна. Энэ ашгаас Эрдэнэт үйлдвэр, Эрдэнэт хот, Эрдэнэтийн ард түмэн хүртэх ёстой. Энэ нь цаашид байгалийн баялгийн үр өгөөжийг орон нутаг, иргэд шууд хүртэх жишиг болно гэж УИХ-ын гишүүн Н.Алтанхуяг үзжээ.

Гэвч түүний өргөн барьсан тогтоолын төслийг МАН-ынхан дэмжээгүй. Энэ талаар тэрбээр "Н.Алтанхуяг гэдэг хүн санаачилсан болохоор дэмжихгүй байна. Гэхдээ ямар нэг хэлбэрээр хийх байх. Н.Алтанхуягийн нэргүйгээр хийж болно. Надад нэрээ заавал гаргах сонирхол алга. Эцэстээ аймгийн иргэд хожиж, хөрөнгө нь аймагт үлдэж байвал Засгийн газар нь хийнэ ээ, хэн хийх нь хамаагүй" гэсэн байр суурийг илэрхийллээ.

Б.Хэрлэн