УИХ-ын гишүүн Б.Пүрэвдорж өнгөрсөн баасан гаригт төмөр замын царигийн тухайн тогтоолын төслийг УИХ-ын даргад өргөн барьжээ. Энэ талаар өнөөдөр /2022.10.24/ мэдээлэл хийлээ.

Тэрбээр "Төмөр замын талаар төрөөс баримтлах бодлогод уул уурхайн ордоос хилийн боомт хүртэлх төмөр зам ямар царигтай байхыг Засгийн газрын өргөн барьснаар УИХ шийднэ хэмээн заасан байдаг. Гэтэл УИХ-ын тогтоолгүйгээр Тавантолгойгоос Гашуунсухайт хүртэл өргөн төмөр зам тавьсан. Энэ нь өнөөдөр мухар зам болчихоод асуудал үүсгээд байна. Өргөн төмөр замаар зөөсөн уул уурхайн бүтээгдэхүүнийг хил дээр очоод  нарийн төмөр зам руу шилжүүлэх байгууламжийг 300-400 сая ам.доллараар барих шаардлага бий болоод байна. Энэ их мөнгө Монгол Улсад байхгүй. Тиймээс тухайн улсын царигтай адил царигтай төмөр зам барих тогтоолын төслийг өргөн барилаа. Өөрөөр хэлбэл уул уурхайн бүтээгдэхүүнийг ОХУ руу тээвэрлэвэл өргөн, БНХАУ руу гаргавал нарийн төмөр зам тавих ёстой. 

Цаашид Шивээхүрэн, Бичигт, Ханги Мандал, Ховд аймгийн Булганы боомтод барих төмөр замуудыг хөрш орны бодлогод нийцүүлэн эдийн засгийн үр ашигтай барих нь уул уурхай болон МАА-н бүтээгдэхүүнийг экспортлоход эерэг үр дүн авчирна" хэмээн үзэж байна. 

Б.Хэрлэн