УИХ-ын гишүүн Ш.Адьшаа 2023 оны төсвийн хуулийг дагуулж оруулж ирсэн Ашигт малтмалын тухай хуулийн нэмэлт өөрчлөлтийн талаар өнөөдөр /2022.10.21/ мэдээлэл хийлээ.

Тэрбээр Ашигт малтмалын тухай хуулинд оруулж байгаа нэмэлт өөрчлөлт хардлагатай байгаагаа илэрхийллээ. Энэ тухай Ш.Адьшаа гишүүн “Энэ хуулийн 42 дугаар зүйлд нутгийн өөрөө удирдах байгууллагатай албан ёсны гэрээ байгуулж, хандив өгөх тухай заалтыг оруулсан байна. Мөн тухайн орон нутагт уул уурхайн лиценз эзэмшигч компаниуд монгол болон гадаад ажилчдын харьцааг оруулсан байна.

Энэ хуулийн төслийг Эдийн засгийн байнгын хорооны хуралдаанаар хэлэлцэхэд УУХҮ-ийн сайд Ж.Ганбаатар “надаас санал аваагүй” гэж хэлсэн. Салбарын сайдаас нь санал авахгүйгээр хулгай, луйварын аргаар хууль оруулж ирсний ард том асуудал нуугдаж байна.

Уул уурхайн компаниуд орон нутагт хандив тусламж нэрээр өчүүхэн зүйл өгдөг. Үүнийг тухайн нутгийг удирдаж байгаа хэдхэн хүн эрүүл мэнд, боловсролд зориулж байгаа нэрээр идчихдэг тогтолцоо бий болсон. Үүнийг төр улам баталгаажуулж байгаад харамсаж байна” гэдгийг хэллээ.

Мөн тэрбээр үүнийг баталсан жишээг дурдлаа. Ховд аймгийн ИТХ өнөөдөр ээлжит бусаар хуралдаж байна. Энэ хурлаар Хар ус нууруудын хотгорт газрын тосны хайгуулын ажил хийх тухай асуудлыг хэлэлцэж байна. “Хас” Ч.Ганхуяг гэдэг хүн хоёр хоногийн өмнө Ховд аймгийн ард иргэдэд өвс тэжээл тараасан. Ч.Ганхуягийн дүү Ч.Гантулга Эрдэнэбүрэнгийн УЦС-ын ашиглалтын өмнөх захиргааны дарга хийж байгаа. Ч.Ганхуяг яагаад гэнэт Ховд руу очиж, иргэдэд хайр зарлаж, өвс тэжээл тараагаад яваад байгаа юм бэ” хэмээн хардлагаа илэрхийллээ.

Б.Хэрлэн