УИХ-ын гишүүн Ц.Даваасүрэн өчигдөр чуулганы хуралдааны танхимаас Сангийн сайд Б.Жавхлангийн талаар ноцтой баримт дэлгэсэн. Тэрбээр “Сангийн сайд Б.Жавхлан Жэтфинанс ББСБ-аараа Монголбанкны бичил санхүүгийн сангаас зургаан хувийн хүүтэйгээр гурван удаа 900 тэрбум төгрөгийн зээлийг авсан” хэмээн мэдэгдсэн.

Энэ талаар Сангийн сайд Б.Жавхлан өнөөдөр тайлбар өглөө. Тэрбээр “Би тэвчээртэй, анхааралтай сонслоо. Арай хэтэрч байна, хэмжээтэй байх хэрэгтэй.

Жэтфинанс ББСБ-аараа 900 тэрбум төгрөг авсан гэж ярьсан. Даваасүрэн гишүүн санхүүгийн мэргэжилтэй хүн байна, 900 тэрбум төгрөг гэдэг дүнгээ ойлгож байгаа байх. Мэдэж будилж байх шиг байна.

Бичил санхүүгийн хөгжлийн сан Монголбанкны эх үүсвэр огт биш. Дэлхийн банкны тогтвортой амьжиргаа сангийн дэргэд байдаг төслийн нэгж. Энэ сангийн эргэлтийн хөрөнгө тухайн үед 10 тэрбум орчим байсан байна. Эндээс яаж 900 тэрбум төгрөгийн зээл гарахав дээ. Гурван удаа гэхээр 2.7 их наяд болох нь ээ дээ.

Жэтфинансад манай дүү оролцоотой байсан нь үнэн. 2020 оны сонгуулийн өмнөхөн би дүүдээ шаардлага тавьж, “ийм бизнес дэмий” гэж болиулсан. Жэтфинансийн зээлийн түүхийг харвал 2012 онд 260 сая төгрөг, 2014 онд 260 сая төгрөг, 2015 онд 400 сая төгрөгийн зээл аваад, ямар нэг зөрчилгүйгээр төлсөн байгаа. Хамгийн сүүлийн зээлийг 2018 онд төлж дуусгасан байна. 900 тэрбум төгрөгийн зээлийг хаанаас гаргаж ирснийг гайхаад байна" гэсэн тайлбарыг өгч, шалгуулахад бэлэн гэдгээ илэрхийллээ.