АН-ын Үндэсний бодлогын хорооны анхны хуралдаанаар хэлэлцсэн асуудлын талаар УИХ-ын гишүүн Д.Ганбат мэдээлэл хийлээ. Тус хорооны хуралдаанаар Монгол Улсын 2023 оны төсвийг хэлэлцэж, төслийг Засгийн газарт буцаах ёстой хэмээн үзжээ.

Энэ талаар УИХ-ын гишүүн Д.Ганбат “Төсөв, мөнгөний бодлого тэлсэн маягтай байгаа. Нэг бодлого нь нөгөө бодлогоо унагаасан. Төсвийг цаашид алдагдалтай батлах боломжгүй болсон ийм үед алдагдалтай төсөв оруулж ирсэн.

Монголын ард түмний амьдрал, хувийн хэвшлийн үйл ажиллагаа хүндэрсэн ийм нөхцөлд эрх баригчид нөгөө л дарга нарыг тэжээдэг бялуурсан төсөв оруулж ирж, батлах гэж улайран гүтгэж байна. 2023 онд Монгол дефольт зарлах магадлал маш өндөртэй улсын тоонд орчихоод явж байгаа.

Ийм нөхцөлд 40, 50 сайд, 200 мянган төрийн албан хаагчийг цалинжуулсан, төрийн өмчит компаниудыг тэтгэсэн төсөв баталж болохгүй. Төсвийг энэ байдлаар баталвал Монгол Улс дефольт зарлана” гэсэн байр суурийг илэрхийллээ.

Мөн тэрбээр УИХ-ын дарга Г.Занданшатар, иргэдийг “ул” гэж хочилдог ХНХЯ-тай хариуцлага тооцох ёстой гэдгийг хэлж байна.