Хөдөлмөр, нийгмийн хамгааллын сайд Д.Сарангэрэл амьжиргааны түвшин доогуур иргэдийг  “Ул”- ныхан гэж нэрлэдэг тухай үг унагаж, улмаар суудлаасаа буусан. Түүнийг огцруулах шийдвэр гаргасан тухайгаа Засгийн газрын хэрэг эрхлэх газрын дараг Д.Амарбаясгалан танилцуулахдаа “Д.Сарангэрэл сайд хэлэлцүүлгийн үеэр манай яамныхан иргэдийг давхаргаар нь ангилдаг гэж хэлсэн. Үүнтэй холбогдуулж яаманд өнөөдрөөс эхлэн шалгалт оруулж, нийгмийн давхарга болон иргэдийг ангилж байгаа байдалд хяналт шалгалт хийж, эргээд хэвлэл мэдээллийн байгууллагаар дамжуулан иргэддээ мэдээлнэ” хэмээн мэдэгдсэн. 

Харин сайдын суудлаасаа буусан Д.Сарангэрэл гишүүн байнгын хорооны хуралдааны үеэр ""Ул"-ны айл гэдэг үгээр их хөөцөлдөж байна. Ул гэдэг үг надтай хамт яамнаас явсан. Та бүхэн айлтгүй. Гэхдээ айл нь үлдсэн. Ул гэдэг үгийг хэрэглэдэггүй гээд дэд сайд яриад зогсож байна. Гэтэл яамны ажил хариуцсан хүмүүс чинь 2008 оноос хойш энэ үгийг хэрэглэж, судалгаанд ашигласан гэдгийг хэд хэдэн дарга хэлж байгаа. Үүнийг мэдэхгүй явна гэдэг гутамшиг. Түүнээс гадна үүнийг хэлсэн хүмүүсийг буруутгах хэрэггүй" хэмээн бухимдлаа илэрхийлсэн юм. 

Тэгвэл Засгийн газраас хэн "Ул"-ны айл гэдэг үг хэллэгийг гарсан бэ? гэдгийг судалж эхэлсэн байна. Энэ талаар тус яамны дэд сайд өчигдөр хэвлэлд  "Засгийн газрын хэрэг эрхлэх газраас манай яаманд шалгалт хийж байгаа. Шалгалт хийсний дараа "улны" гэх нэр томъёог хэрэглэж байсан эсэх нь тодорхой болно" хэмээн мэдэгдлээ. 

Удахгүй бодлого тодорхойлогч яам нь нийгмийн давхаргаар иргэдээ ангилан ялгаж байсан уу? гэдэг нь удахгүй тодорхой болох нь ээ. 

Монгол Улсын Үндсэн хуулийн 14-р заалт: 

 1.Монгол Улсад хууль ёсоор оршин суугаа хүн бүр хууль, шүүхийн өмнө эрх тэгш байна.

2.Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно.