БНСУ-д гэрээгээр очсон Монгол эмэгтэй зодуулж байгаа бичлэг нийгмийн сүлжээнд шүүмжлэл дагуулж байна.  Тодруулбал, БНСУ-д ажиллаж буй монгол эмэгтэйг ажил олгогч БНСУ-ын эрэгтэй эхнэртэйгээ нийлэн маш хэрцгийгээр зодож байгаа бичлэг тархаж байна.

Өнөөдөр БНСУ-д манай улсын 36 950 иргэн тус улсад оршин сууж байгаа албаны мэдээлэл бий. Үүний 16 301 нь хууль бусаар амьдарч байгаа. Нэг үгээр хүний нутгийн хөдөлмөрийн үнэлэмж мянга мянган Молнголчуудыг нуугдаж амьдрахад хүргээд байна. Тухай улсад амьдарч байгаа нийт иргэдийн гуравны нэг нь хууль бусаар оршин сууж байгаа гэсэн үг юм. Нийтэд хүрсэн бичлэг дээрх хүчирхийлэлд өртөж байгаа эмэгтэй бол тус улсад гэрээгээр ажиллаж, амьдарч буй. Гэтэл зодуур цохиурын бай болж, өмөөрөх эх оронгүй мэт хүний нутагт дарлагдаж байна. 

Энэ бол анхны тохиолдол биш юм. Сануулахад, хоёр жилийн өмнө БНСУ-ын Инчон хотын Бүпён дүүрэгт нэгэн үйлчилгээний газарт жижүүр хийдэг Монгол улсын иргэн Н хамт ажилладаг солонгос захиралдаа нэг цагийн турш зодуулж, хүчирхийлэлд өртсөн хэрэг гарсан. Тухайн үед Монгол бүсгүйг үсдэж, дэвсэж, алгадаж, өшиглөж, цохисо, цагийн турш ноцолдож тэмцсэний эцэст зугатаж гараад хамгийн эхэнд тааралдсан дэлгүүр орж, цагдаад дуудлага өгөх зуур захирал нь дахин гарч ирж бүсгүйг чирч машиндаа суулгахыг оролдсон. 

Дараа нь мөн л Монгол охин БНСУ-д 14-16 насны дөрвөн сурагчид зодуулж, хүчирхийлэлд өртсөн юм. Тухайн үед Ульсан хотын прокурорын зүгээс яллагдагч хоёр охиныг насанд хүрээгүй гэдэг шалтгаанаар ялаас чөлөөлж, нөгөө хоёр охиныг эцэг эхийн хяналтад байлгах ял шийтгэлийг төлөвлөсөн байсан нь нийгмийн сүлжээнд шүүмжлэл дагуулж эхэлсэн. Ингэж энэ асуудал холбогдох албаныхны анхааралд очсон байсан юм. Ил болсон нь, олон нийтийн анхааралд өртсөн нь л энэ. Хараар тус улсад ажиллаж байгаа хичнээн Монгол хүний эрх зөрчигдөж, "ул" болж байгааг таахад бэрх.... Хамгийн хачирхалтай тус улсад суугаа Элчин сайдын яамныхан болон Монгол Улсын гадаад харилцааны яамныхан дээр бүх жишээнүүдийг нийгмийн сүлжээнд тархсан хойно нь "Судалж байна, шалгаж байна" гэсэн тайлбарыг өгдөг. Харамсалтай биз. Тухайн улс орон ажиллаж, амьдарч байгаа Монгол иргэдийнхээ эрхийг хангахад гол анхаарлаа хандуулах нь Элчин сайдын яамны нэн тэргүүний үүрэг, хийх ажил нь байх ёстой.