Монгол Ардын намын бүлгээс мэдээлэл хийлээ. Өнөөдрийн бүлгийн хуралдаанаас гаргасан шийдвэрийн талаар МАН-ын бүлгийн дарга Д.Тогтохсүрэн "Бүлгийн хурлаар Монгол Улсын 2023 оны нэгдсэн төсвийн төсөл, түүнийг дагаж орж ирсэн хуулийн төслүүдийн хэлэлцэх эсэхийг хэлэлцэж, гишүүд дэмжлээ. Энэ долоо хоногийн мягмар гаригт Төсвийн байнгын хороо, пүрэв гаригт УИХ-ын нэгдсэн чуулганы хуралдаанаар хуулийн төслүүдийг хэлэлцэнэ.

Засгийн газраас өргөн барихдаа 2023 оны төсвийг дагаж нийт 102 хуулийн төсөл оруулж ирсэн. Үүнд, Төрийн хяналт шалгалтын тухай хууль, Гүйцэтгэх засаглалын хяналтын тухай хууль гэсэн хоёр том хууль орж ирж байна. Эдгээр хуультай холбоотой 82 хууль дагалдаж орж ирсэн" гэлээ. 

Бүлгийн хуралдаанаар хэлэлцсэн асуудалтай холбогдуулан сэтгүүлчид асуулт асууж хариулт авлаа. 

-Хяналтын тухай хоёр хуулийн агуулгыг танилцуулахгүй юу?

-Нэгдүгээрт, одоогоор мэргэжлийн хяналтын нэгдсэн явж байгаа. Засгийн газрын зүгээс нэгдсэн тогтолцоог тохирохгүй гэж үзээд 13 хяналтыг салбарын сайдад нь өгье гээд мэргэжлийн хяналтнуудыг салбар салбарт нь өгч байгаа. Хоёрдугаарт, ерөнхий хяналтын чиг үүргийг хариуцах агентлагийг ЗГХЭГ-ын дэргэд байгуулахаар хууль орж ирж байна. 

-Ипотекийн зээлийн асуудал хэрхэн тусгагдаж байгаа бол, ирэх оны төсөвт? 

-Өнөөдөр УИХ-ын даргын захирамжаар 2023 оны төсөвтэй холбоотой ажлын хэсэг гарч байна. Энэ ажлын хэсгийн хүрээнд ипотекийн зээлийн асуудлыг судалж, шийдэл гаргах байх. 

-Төрийн албаны хуульд өөрчлөлт орох юм байна. Үүнд тэтгэвэртээ гарч байгаа хүмүүсийг үргэлжлүүлэн ажиллуулах гэж байгаа гэх мэдээлэл байна? 

-Төрийн албаны тухай хуульд хоёр өөрчлөлт бий. Нэгдүгээрт, орон нутагт ажиллаж байгаа төсвийн алба хаагчдын цалинг 20 хувь нэмэгдүүлэхээр төсөвт суулгасан. Орон нутгийн төсөвт 20-иос бусад хувиар урамшуулж болно гэсэн заалт орсон байгаа. Хоёрдугаарт, тэтгэврийн насанд гарсан иргэд давхар цалин авч байгаа бол ажлаас нь чөлөөлнө. Энэ бол зарчмын хувьд зөв.