Засгийн газрын өнөөдрийн хуралдаанаас цементийн гаалийн албан татварыг энэ он дуустал тэглэх шийдвэр гаргалаа. Энэ талаар Сангийн сайд Б.Жавхлан “Цаг үеийн нөхцөл байдалтай уялдуулан Засгийн газар шуурхай шийдвэр гаргалаа.  ЗТХЯ, БХБЯ-наас ирүүлсэн саналыг Сангийн яам судалж, өнөөдрийн Засгийн газрын хуралдаанд оруулж, шийдвэрлэлээ.  

Манай улсад цементийн дөрвөн үйлдвэр үйл ажиллагаа явуулдаг. Үүнээс Хөтөлийн цемент шохойн үйлдвэрийн засвар хийж, бүрэн зогссон. Их ачааллын үед цемеентийн хомстол үүсэж, Дархан-Улаанбаатар болон бусад замын ажил бүрэн зогсох эрсдэлтэй тулгарч байна.  Мөн үнэ өсөх эрсдэл үүсэж байна.  Тиймээс Засгийн газар шийдвэр гаргаж, өсөн нэмэгдэж байгаа хэрэгцээг импортын цементээр хангах боломжийг нээж байна” гэсэн мэдээллийг өглөө.

Одоо цементийн зах зээлийн үнэ нэг тонн нь 500-600 мянган төгрөг хүрээд байна. Гаалийн татварыг чөлөөлснөөр цементийн үнэ нэг тонн нь 400 мянган төгрөг болон буурна гэж үзэж байна.