Ховд аймгийн Иргэдийн төлөөлөгчдийн хурлын VIII хуралдаанаар Э.Болормааг тус аймгийн Засаг даргаар сонголоо. Түүнийг ИТХ-ын 30 төлөөлөгч дэмжиж, Ерөнхий сайдад уламжлан, батламжлуулахаар болов.

Засаг даргаар сонгогдсоны дараа Э.Болормаа “Намрын тэргүүн сарын шинийн 02-ны өлзий учрал бүрдсэн энэ сайхан өдөр та бүхний итгэл найдвар, Ходв аймгийн 90 гаруй мянган иргэний хүсэл эрмэлзлэлийг өвөртөлж, Монгол Улсын түүхэнд анхны эмэгтэй Засаг дарга болох түүхэн үүрэг хариуцлага оногдуулсанд гүн талархал илэрхийлье.

Миний бие энэхүү үүрэг хариуцлагыг гүнээ ухамсарлаж байна. Монгол Улсын хүн амын тэн хагасыг эзэлж, өрх гэрийн тулах багана, өндөр төрийн түшиг тулгуур болсон эмэгтэйчүүдийн нэр төр, авьяас, мэдрэмжийг харуулах боломж гэж харж байна. Мөн сурч эзэмшсэн боловсрол, ажлын туршлагаа эх орныхоо хөгжлийн төлөө зориулахыг хүсэж мөрөөддөг шинэ үемйн залуусынхаа түүчээ болж байгаагаа ухамсарлаж байна.

Өнөөдрийн та бүхний сонголт Шинэ сэргэлт, Шинэ Ховдын эхлэл гэдгийг хэлж, Ховд аймгийн шинэ түүх, хөгжлийг түүчээлнэ гэдгээ илэрхийлэв.

Б.Хэрлэн