Гадаад харилцааны сайд Б.Батцэцэг ОХУ-ын Гадаад хэргийн сайд Сергей Лавров нарын хэлэлцээ өндөрлөлөө. Хэлэлцээрийн үр дүнгийн талаар Гадаад харилцааны сайд нар хамтарсан мэдээлэл хийлээ.

ОХУ-ын Гадаад хэргийн сайд Сергей Лавров: Оросын төлөөлөгчдийг халуун дулаанаар хүлээн авч уулзсан та бүхэнд халуун талархлаа илэрхийлье.

Б.Батцэцэг сайдтай хийсэн яриа хэлэлцээ маш үр дүнтэй болж, харилцаа найрсаг уур амьсгалтай байв.

Манай хоёр улсын хооронд сайн хөршийн харилцаа, хамтын ажиллагааны олон жилийн түүхэнд суурилж, идэвхтэй хөгжиж байгаа. Орос-Монголын ард түмэн дэлхийн II дайны он жилүүдэд нацизмыг ялан дийлэхэд байгуулсан хоёр улсын байлдааны нөхөрлөлийг сайн санаж, .явж байгаа. Өнөөдрийн уулзалтаар бид ялалтад оруулсан Монгол Улсын хувь нэмрийг дахин өндрөөр үнэлсэн.

Хоёр талын болон олон улсын харилцаа, хамтын ажиллагааны олон асуудлаар санал солилцож, Улаанбаатар хотноо 2019 оны 09 дүгээр сард гарын үсэг зурсан хоёр талын найрсаг харилцаа, иж бүрэн стратегийн түншлэлийн тухай хэлэлцээрийн дагуу хоёр талын хамтын ажиллагааг улам өргөжүүлэхэд санал нэгдлээ.

Өнгөрсөн оны 12 дугаар сард Монгол Улсын Ерөнхийлөгч У.Хүрэлсүх айлчлал хийх үеэр хамтын ажиллагааны бүхий л асуудлаар санал солилцсон.

Хоёр талын худалдаа эрс өсөн нэмэгдэж байгаа. Өнгөрсөн онд өмнөх үеэс 30 гаруй хувиар нэмэгдсэн бол энэ оны эхний хагас жилд 45 гаруй хувиар нэмэгдсэн байна.

Эрчим хүч, тээвэр, байгаль орчин, хүмүүнлэг, соёлын салбарт хамтран ажиллах болон сансарыг хамтран судлахаар санал солилцлоо.

Олон улсын асуудлаарх манай байр суурь ижилхэн эсвэл ойрхон байгаа. Манай хоёр улс НҮБ-ын үндсэн дүрмийг дээдэлж, тусгаар улсуудын эрх мэдлийг хүндэтгэнэ.

Дэлхий дахины өнөөдрийн хурцадмал байдлыг нарийвчлан тайлбарлаж, тэр дундаа АНУ болон түүний холбоотнуудын зүгээс өөрийнхөө асуудлыг бусдын гараар шийдүүлэх хүсэлтэй холбоотой асуудлаар нарийн ярилцлаа. Олон жилийн хугацаанд Украиныг Оросын эсрэг чиглэсэн шинэ нацизмын дэглэмтэй улс болгон хувиргаж, Украин улсын нутаг дэвсгэрээс ОХУ-д аюул занал учруулж байна.

Донбасс болон Украины бусад нутгуудад явуулж буй цэргийн тусгай ажиллагааны үйл явцын талаар мэдээлэл өглөө. Бид Украинд болж буй үйл явдлын үнэн бодит мэдээллийг дэлгэхийг хүсэж байгаа. Харамсалтай нь барууны орнууд үнэн бодит, хараат бус эх сурвалжуудыг хязгаарлаж байна.

 

Монгол Улс ШХАБ, ЕвроАзийн эдийн засгийн холбоо, хамтын аюулгүй байдлын гэрээний байгууллагатай холбоо харилцааг улам илүү өргөжүүлэх талаар тодорхой саналуудыг хэлсэн.

Хоёр талын хамтын ажиллагааг бүрэн ашиглаж, олон улсын тавцанд хамтын ажиллагааг улам илүү уялдуулахад хоёр талаас хүчин чармайлт гаргасан өнөөдрийн яриа хэлэлцээний үр дүнд сэтгэл хангалуун байна.