Эрээн-Замын-Үүд боомт нээгдэж, 10 хоногийн хугацаанд 418 тээврийн хэрэгсэл, 549 чингэлгээр 9157 тонн ачааг нэвтрүүлсэн байна. Өчигдөр гэхэд улсын хилээр 994 мянган тонн ачааг 57 чингэлгээр нэвтрүүлжээ.

Эрээний гаалийн хяналтын талбайгаас тэг цэг хүртэлх тарифийг БНХАУ-ын тал 440 юаниар / монгол мөнгөөр 1.8 сая төгрөг/ тогтоосон. Тэг цэг дээр худалдан авагч тал нэг ачаатай чингэлгийг шилжүүлэн ачих төлбөрт 65000 төгрөг төлж байгаа. Эрээнээс-Замын-Үүд хүртэлх зайд 2 сая орчим төгрөг төлж байна.

Замын-Үүдээс-Улаанбаатарын чиглэлд тээврийн жолооч нар худалдан авагчтай үнэ хөлсөө тохироод явж байгаа. Өчигдрийн мэдээллээр 2.5-3.5 сая төгрөгөөр тээвэрлэж байна. Ингэхээр Эрээнээс-Улаанбаатар хүртэлх авто тээврийн дундаж ханш 5 сая төгрөг байгааг албаныхан мэдээлж байна.

Ачаа барааг Хятадын талын гаалийн бүрдүүлэлтэд орсон дарааллаар татаж авч байгаа аж. Одоогоор гаалийн бүрдүүлэлт хийгдээгүй 51 чингэлэг Замын-Үүдийн гаалийн хяналтын бүсэд хүлээгдэж байна.

Харин төмөр замаар өнөөдрийн байдлаар 47 чингэлгийг татан аваад байна. Эрээн өртөөнөөс төмөр замын өргөн царигаар ачаа татан авах чиглэлээр Хөх хотын төмөр замтай ярилцаж, боломжийг судалж байна. Мөн нарийн царигаар БНХАУ болон бусад орон руу экспортын бүтээгдэхүүн гаргахаар Хөх хот, Бээжингийн төмөр замтай ярилцаж байна. Одоогоор шийдвэр гараагүйг УБТЗ-аас мэдээллээ.

Б.Хэрлэн