Эдийн засгийн байнгын хорооны тогтоолоор Виртуал хөрөнгийн үйлчилгээ үзүүлэгчдийн тухай хуулийг хэлэлцүүлэгт бэлтгэх ажлын хэсэг ажиллаж байна. Ажлын хэсгийн ахлагч, УИХ-ын гишүүн Н.Учрал, Монголбанк, СЗХ-ны удирдлагуудтай хамтран виртуал хөрөнгийн талаар мэдээлэл хийлээ.

Өнөөдөр таван төрлийн виртуал хөрөнгийн үйлчилгээ үзүүлэгч платформ ажиллаж, 7 төрлийн койн арилжаалагдаж байна. 2021 оны эхний хагас жилд 2 их наяд төгрөгийн борлуулалт хийгдсэн байна.

“Койныг сайтар судалж байж авах ёстой. Орон байр, унаагаа зарж, зээл авч койн авч байгаа нь маш их эрсдэлд оруулна. Үүссэн эрсдэлийг иргэн өөрөө хариуцана. Төр хариуцлага хүлээх боломж байхгүй. Койн худалдаж авсан хүн бүр ашиг хүртээгүй” гэдгийг УИХ-ын гишүүн Н.Учрал онцолж байна.

Хуулийн төслийн талаар ажлын хэсгийн ахлагч “Дэлхийн 84 улс виртуал хөрөнгийг албан ёсоор хуульчилсан. Тиймээс манай улс ч энэ хөрөнгийн үйлчилгээ үзүүлэгчийн хууль гаргаж, тавигдах шаардлагыг тодорхой болгон, СЗХ бүртгэн хяналтаа тавьдаг болно.   

Койн гаргагчийн талаар мэргэжлийн холбоогоор шаардлагатай дүгнэлт гаргах зохицуулалтыг хуулинд тусгаж байгаа. Үүний дараа биржийн үйл ажиллагаа явуулж байгаа платформууд хүлээж аваад, шаардлагад нийцсэн эсэхийг дүгнэж, арилжааг эхэлнэ” гэсэн танилцуулгыг өглөө.

Мөн койнд ямар ч баталгааг байхгүй учраас иргэдийг сэтгэл хөдлөлөөр худалдан авахгүй,  сайтар судлаарай. Нэг хэсэг ашиг хүртэж байгаа ч нөгөө хэсэг хүн алдагдалд орж байгааг анхаарууллаа. 

Б.Хэрлэн