Шатахууны импортын асуудлыг зохицуулаагүй хариуцлагыг АМГТГ-ын дэд дарга Ц.Эрдэнэбаяр хүлээхээр болжээ. Тэрбээр өнөөдөр үүрэгт ажлаасаа чөлөөлөгдөх хүсэлтээ өгсөн байна.

Ерөнхий сайд Л.Оюун-Эрдэнэ шатахууны тасалдал үүсгэсэн асуудлаар холбогдох албан тушаалтанд хариуцлага тооцох үүргийг Уул уурхай, хүнд үйлдвэрийн сайд Г.Ёндонд өгсөн. Харин Г.Ёндон сайд хариуцлага тооцох албан тушаалтнаа олжээ. Тэрбээр энэ  удаа АМГТГ-ын дэд дарга Ц.Эрдэнэбаяраар туг тахиад өнгөрөхөөр шийдсэн бололтой. Мөн АМГТГ-ын дарга Х.Хэрлэн ч түүний ард хариуцлагаас мултарч хоцорлоо. 

Манай улс шатахууны 30 хоногийн нөөцтэй байх ёстой. Гэтэл одоо наймхан хоногийн нөөцтэй байна. Импортын татан авалтаа эрчимжүүлж, нөөцөө бүрдүүлэхгүй бол Г.Ёндон сайд, Х.Хэрлэн дарга хоёрын суудал цаашид тийм ч баталгаатай байхгүй л болов уу.

В.Бат