Цагдаагийн албан хаагчид иргэдийн биед халдаж байгаа бичлэг олон нийтийн цахим сүлжээнд цацагдсан. Уг асуудлын талаар  ХЗДХ-ийн сайд Х.Нямбаатар тайлбар өглөө. Тэрбээр, “Цагдаагийн байгууллагын албан хаагчтай холбоотой бичлэг гарсан. Энэ нь 2019 оны хоёрдугаар сарын 25-ны шөнийн 03 цагт болсон үйл явдлын талаар юм. Тухайн үед бааранд иргэд архидаж, танхайрч байна гэсэн дуудлагын дагуу Чингэлтэй дүүргийн эргүүлийн хоёр цагдаа очсон юм билээ. Шалгалтын явцад цагдаагийн албан хаагчдын эсрэг эсэргүүцэл үзүүлж, сандлаар цохисон байсан. Ингээд манай цагдаагийн албан хаагчид иргэдтэй зүй бус харилцах процесс явагдсан.

Ингээд ар гэрийнхэн нь бичлэг үзүүлж, дарамтлах байдлаар сүүлийн хоёр жилийн хугацаанд цагдаагийн албан хаагчдаас зургаан сая төгрөг авсан байсан. Энэ хэргийг холбогдох байгууллагуудаас шалгаж байгаа. Цагдаагийн байгууллагын удирдлагуудад ямар чиглэл өгсөн бэ гэхээр иргэдтэй харилцах утасны сурталчилгаа хий, дуудлага мэдээлэл тогтмол авч, өргөдөл гомдлуудыг тухай бүрд нь барагдуулах ажлуудыг зохион байгуулах, албан хаагчдад сэтгэл зүй, зан суртахууны сургалтыг зохион байгуулах чиглэл өгсөн. Тиймээс иргэд та бүхэн цагдаагийн албан хаагчидтай холбоотой гомдол дуудлага байвал өгөөрэй” гэж мэдээллээ.  

Г.Мичидмаа