Цахим орчинд өөрийгөө М.Чингисхаан хэмээн нэрийдсэн М.Баасанжаргал согтуугаар жолоо барьж, хурд хэтрүүлэн хөдөлгөөнд оролцжээ. 

Энэ талаар Тээврийн цагдаагийн албанаас "Нийслэл хотод 60 километр цагийн хурдтай хөдөлгөөнд оролцох хурдны хязгаартай. Гэтэл Чингис хаан гэгч нь 96 километр цагийн хурдтай, 0.76 хувийн согтолттой хөдөлгөөнд оролцсон байна" гэж мэдээллээ. 

Чингис хаан гэгч М.Баасанжаргал өмнө нь хэвлэлд өгсөн ярилцлагадаа "Би өөрийгөө 2033 он хүртэл бэлтгэнэ. Яг Чингис хаан шиг эх орныхоо төлөө, өрөөл бусдын төлөө, үр хойчийнхоо төлөө өөрийгөө зориулна. 2033 он болоход миний бие яг 44 нас хүрнэ. 44 насанд миний хийж бүтээснийг ард түмэн хараад үнэхээр энэ залуу хийж чадсан юм байна гэх юм бол магадгүй хаанд өргөмжлөгдөх байх" хэмээсэн удаатай. 

Алба хаагчдаас өнгөрөгч баасан, бямба, ням гарагт хийсэн хяналт шалгалтын үеэр согтуугаар тээврийн хэрэгсэл жолоодсон нийт 179 зөрчил илрүүлсний 148 нийслэлд, 31 орон нутагт тус тус бүртгэгдэж хуулийн дагуу хариуцлага тооцсон байна.  Эдгээр өдөрт согтууруулах ундааны зүйл хэрэглэсэн үедээ автомашин жолоодож осол гаргасны улмаас 7 хүний эрүүл мэндэд хохирол учруулжээ.

Монгол Улсын Замын хөдөлгөөний дүрэмд:

“Архи, согтууруулах ундааны зүйл хэрэглэсэн үедээ тээврийн хэрэгсэл жолоодох”-ыг хориглосон байдаг.

Иргэд, жолооч та бүхэн архи согтууруулах ундааны зүйл хэрэглэсэн үедээ тээврийн хэрэгсэл жолоодохгүй байхыг цагдаагийн байгууллагаас анхааруулж байна.

Б.Итгэл