Нийслэлийн СХД-ийн нутаг дэвсгэрт гарцаар зам хөндлөн гарч явсан бага насны хүүхдийг согтуу жолооч мөргөж амийг хөнөөсөн осол гарчээ. 

Тодруулбал өчигдөр /2021.03.22/ согтуурлын зэрэг 2 бүхэлтэй жолооч автомашин жолоодон замын хөдөлгөөнд оролцон явахдаа явган хүний гарцаар зам хөндлөн гарч явсан долоон настай хүүхдийг мөргөж амь насыг нь хохироожээ. Хэргийг харъяа дүүргийн цагдаагийн хэлтэст шалгаж байна. 

Мөн хоёр хоногийн өмнө энэ сарын 21-ны өдрийн 14.00 цагийн орчимд СХД-ийн 20 дугаар хороо Сонсголонгийн зам, “Мишээл” эмнэлэгийн зүүн замд суудлын автомашины жолооч, явган зорчигч, бага насны хүүхдийг мөргөж амийг хохироосон осол гарсан. 

Иймд эцэг эх, асран хамгаалагч бага насны хүүхдэд тавих хараа хяналтыг сайжруулах, 0-10 хүртэлх насны хүүхдийг явганаар замын хөдөлгөөнд оролцуулахдаа заавал гартаа хөтөлж, тэвэрч явахыг цагдаагийн байгуууллагаас анхааруулж байна.

Б.Итгэл