Нэр бүхий шүүгч нартай холбоотой дүрс бичлэг цацагдаж олон нийтийн шүүмжлэл дагуулаад байна. Уг шүүгч нарт хэрхэн хариуцлага тооцох талаар Шүүхийн Ёс зүйн хорооны Ажлын албаны дарга Н.Ганбаатар мэдээлэл өглөө. 

Тэрбээр "Энэ харамсалтай хэрэг. Шүүхийн ёсзүйн хороо иргэн, албан тушаалтан, хуулийн этгээдийн гомдлыг хүлээн авч хянан, шалгаж шийдвэрлэдэг дүрэмтэй. "Нэхүүл" хөдөлгөөнөөс энэ сарын 22-ны өдөр буюу өнгөрсөн даваа гарагт бичлэгт дурдагдсан шүүгч нартай холбоотой гомдол ирсэн. Ирсэн гомдлыг Шүүхийн ёсзүйн хороо шүүгч нарт танилцуулдаг. Шүүгч тайлбараа ирүүлснээр 30 хоногийн дотор шалгана. Энэ хугацаанд шалгах ажиллагаа хангалтгүй байна гэж үзэх юм бол дахин 30 хоногоор сунгадаг зохицуулалттай. Процессын дагуу гомдол шалгах ажиллагаа явагдаж байгаа. Шүүхийн ёсзүйн хорооны дүгнэлт гарснаар гэм буруугийн асуудал яригдана. Гэхдээ хувь хүний үйлдлийн тухайд харамсалтай байна" гэлээ. 

Шүүхийн Ёсзүйн хорооны гурван гишүүний бүрэн эрхийн хугацаа дууссан. Одоогоор зургаан гишүүн ажиллаж байгаа. Эдгээр гишүүн гомдлыг шалгаж шийдвэрлэх бололцоотой гэдгийг ажлын албаны дарга онцлов.

Г.Сүрэн