“Эрдэнэс Тавантолгой” компанийн БНХАУ-ын төрийн мэдлийн гэх “Чалко” компанитай байгуулсан гэрээг хууль хяналтынхан шалгаж, улмаар үүнтэй холбоотой МИАТ-ийн хэрэгт холбогдоод байгаа Төрийн өмчийн хорооны дарга асан Д.Сугар, “Эрдэнэс Тавантолгой” компанийн Б.Энэбиш нарыг АТГ-т шалгаж байгаа гэх мэдээлэл цацагдаад байгаа.

Тэгвэл өнөөдөр АТГ-ын Мөрдөн шалгах хэлтсийн дарга Э.Амарбат “АТГ-т Д.Сугарыг шалгуулаагүй, Б.Энэбишийг шалгаж байгаа” гэж мэдээллэв. Тэрбээр “Монголын Засгийн газар Тавантолгойн Баруун цанхиас олборлох нүүрсийг Хятадын “Чалко” компанид нийлүүлэх гэрээг хэдэн жилийн өмнө байгуулсан. 250 сая ам.долларын зээлийн барьцаанд Баруун цанхийг тавиад туучихсан гэх шүүмжлэл дагуулдаг энэ гэрээг УМБГ-ын Эдийн засгийн гэмт хэрэгтэй тэмцэх тасгийнхан өмнө нь шалгаж байсан.

Харин одоо АТГ-ынхан хэргийг тусгайлан шалгаж байна. Үүнтэй холбогдуулан тухайн үед “Эрдэнэс Тавантолгой” ТӨХК-ийн гүйцэтгэх захирлаар ажиллаж байсан Б.Энэбиш болон бусад нэр бүхий хүмүүст эрүүгийн хэрэг үүсгэн шалгаж байна. Учир нь Б.Энэбиш нь “Эрдэнэс Тавантолгой” ТӨХК-ийн гүйцэтгэх захиралаар ажиллаж байх хугацаандаа 1,6 тэрбум төгрөгийн 10 ширхэг автомашин болон бусад чанарын шаардлага хангахгүй худалдан авалт хийснийг мөрдлөгийн явцад тогтоосон. Удахгүй хэрэг прокурорт шилжинэ” гэв.

Б.Одон