АНУ-ын Anthropic компани хиймэл оюун ухааныг зөвхөн компьютер дээрх тооцоолол, симуляцид бус бодит лабораторийн биологийн туршилтад ашиглах шинэ алхам хийжээ. Компанийн мэдээлснээр Anthropic Сан-Францискогийн булангийн бүсэд “wet lab” буюу бодит биологийн туршилтын лаборатори байгуулсан байна.

Тус лабораторид AI-ийн тусламжтайгаар биологийн судалгаа, эм боловсруулахтай холбоотой бодит туршилтууд хийх боломж бүрдэж байгаа аж. Өмнө нь AI эм боловсруулахад ихэвчлэн асар их хэмжээний биологийн мэдээллийг боловсруулах, боломжит молекулуудыг компьютерээр тооцоолох зэрэг “in silico” судалгаанд ашиглагддаг байсан. Харин Anthropic-ийн шинэ чиглэл нь AI-ийн гаргасан таамаг, шийдлийг бодит лабораторийн туршилтаар шалгах явдал юм.

Anthropic энэ ажлаа Claude Science зэрэг шинжлэх ухааны зориулалттай AI хэрэгслүүдтэй холбож байна. Тус компани 2026 оны зургадугаар сард эрдэмтдэд зориулсан Claude Science платформоо танилцуулсан бөгөөд биологи, биомедицин, эмийн судалгааг эхний гол чиглэлүүдийн нэг болгосон юм. Мөн Anthropic-ийн боловсруулж буй технологи нь микроскоп, шингэн зөөвөрлөгч төхөөрөмж, робот гар зэрэг лабораторийн тоног төхөөрөмжийг AI-аар зэрэг удирдах боломжийг судалж байна.

Ингэснээр зарим туршилтыг хүний байнгын оролцоогүйгээр өдөр шөнөгүй автоматжуулан явуулах боломжтой болох юм. Компанийн зорилго нь ялангуяа одоогоор эмчлэхэд хүндрэлтэй, судалгаанд хангалттай хөрөнгө ордоггүй өвчнүүдэд шинэ эмчилгээ олох үйл явцыг хурдасгах явдал гэж Reuters мэдээлжээ. Гэхдээ Anthropic өөрийн лаборатори зөвхөн эм шинээр гаргах зорилготой биш, биологийн шинжлэх ухааны өргөн хүрээний судалгаанд ашиглагдана гэж тайлбарласан байна.

Ийнхүү AI компаниудын өрсөлдөөн зөвхөн “хэн илүү ухаалаг чатбот бүтээх вэ?” гэдгээс цаашилж, хиймэл оюун ухааныг бодит шинжлэх ухааны туршилт, эмчилгээ, шинэ нээлтэд хэрхэн ашиглах вэ гэдэг шинэ шатанд орж байна.

Эх сурвалж: Reuters, Anthropic.