Цагдаагийн байгууллагад 2024.06.21-ний өдрийн 07.10 цагт Хан-Уул дүүргийн II хорооны нутаг дэвсгэрт хүний амь нас хохироосон гэх мэдээлэл ирсэн. Уг мэдээллийг дагуу Эрүүгийн цагдаагийн алба, Мөрдөн байцаах алба, Шүүхийн шинжилгээний ерөнхий газар, Хан-Уул, Сүхбаатар дүүргийн цагдаагийн газар, мөн дүүргийн прокурорын газар хамтран хэргийн газарт шалгалтын ажиллагаа явуулсан. 

Мөрдөн шалгах ажиллагаагаар Чингэлтэй дүүргийн 19 дүгээр хороонд оршин суух 20 настай эрэгтэй Д нь Сүхбаатар дүүргийн I хорооны нутаг дэвсгэрт 2024.06.08-наас 09-нд  шилжих шөнө 32 настай эмэгтэй З-ийн амь насыг, Хан-Уул дүүргийн II хорооны нутаг дэвсгэрт 2024.06.20-ноос 21-нд шилжих шөнө 16 настай эмэгтэй Ш-ийн амь насыг хохироосон болох нь тогтоогдож, шалгалтын ажиллагаа үргэлжилж байна. 

Гэмт хэргийг шуурхай, бүрэн гүйцэд шалгах зорилгоор ЦЕГ-ын тэргүүн дэд даргын тушаалаар Эрүүгийн цагдаагийн алба, Мөрдөн байцаах алба, Хан-Уул, Сүхбаатар дүүргийн цагдаагийн газрын алба хаагчдаас бүрдсэн ажлын хэсгийг байгуулаад байна гэдгийг ЦЕГ-ын Хэвлэл мэдээллийн төвийн дарга Г.Пүрэвдэлгэр мэдээллээ. 

Нийслэлийн прокурорын газраас иргэн Д-г 2024.06.21-ний өдөр эрүүгийн хэрэг үүсгэн яллагдагчаар татаж, Хан-Уул дүүргийн Эрүүгийн хэргийн анхан шатны шүүхээс цагдан хорих, таслан сэргийлэх арга хэмжээ авчээ.