АН-ын "дотоод ардчилал" гэж нэрлэгдсэн хэл ам, хэрүүл талцал даамжирч, эцэстээ сонгуульд оролцож чадахгүй хэмжээнд хүрч болзошгүй байна. УИХ-ын 2024 оны сонгуульд нэр дэвшигчдээ тодруулах алхмаасаа эхлэн АН мордохын хазгай гэгч болж, сонгуульд оролцох эсэх нь эргэлзээтэй болоод байна.
Сонгуулийн байгууллагад улс төрийн намуудаас нэг л шийдвэр очих учиртай. Гэтэл олон толгойтой АН-аас олон тогтоол очиж, СЕХ-ны толгойг эргүүлж, тайлбар сонсох шаардлагатай болов.
Гэтэл намын дарга Л.Гантөмөр нь сураггүй болж, энэ нам эх захгүй холхилдож байна. Нэгэн цагт АН-ын лидерүүд байсан ах нарынх нь зарим нь тэмцэлд уриалж, нөгөө нэг нь сануулга өгч байна.
Хотын дарга асан Э.Бат-Үүл "СЕХ хууль зөрчин, АН-ыг сонгуульд оруулахгүй бол ардчиллыг, АН-ын олон мянган гишүүдийг “гэр оронгүй болгон гудамжинд гаргасан” хэрэг! Тэмцэл гудамжинд шилжинэ. Энэ тэмцэлд бэлдэх хэрэгтэй, гишүүд ээ! хэмээн жиргэсэн байна.
Харин экс Ерөнхийлөгч Ц.Элбэгдорж "Ардчилсан Нам олон өнгөтэй нам. Баярцогт сонгуулиа удирдаад, Гантөмөр бодлогоо яриад явсан нь зөв байх. Ард түмний хүлээлт мөрөөдлөөр шал арчих эрх Та хоёрт байхгүй шүү..." хэмээн залуустаа сануулга өглөө.
Ард түмний АН-ыг гэх итгэл, найдвар тасардаггүй. Эрх баригч байг гэхэд хүчтэй сөрөг хүчин байгаасай гэж хүсдэг. Харамсалтай нь АН-ынхан ард түмний итгэл найдварийг дааж чаддаггүй, хүчгүй, сул дорой. Энэ янзаараа 2024 оны сонгуулиар ч гудамжинд үлдэж, ирэх дөрвөн жилд ч өөр хоорондоо хэмлэлдсээр байх бололтой.
Б.Хэрлэн
Уншиж байна |