Өнгөрсөн долоо хоногт Өмнөд Солонгосын эрх баригчид БНАСАУ энэ сард тив алгасах баллистик пуужин хөөргөж болзошгүй гэж таамаглаж байгаа талаараа мэдэгдэж байсан. Тэдний таамаглал биелж, Хойд Солонгос энэ сарын 17, 18-ны өдрүүдэд пуужин харважээ. 

Ёнхап агентлагийн мэдээлснээр, 12 дугаар сарын 17-ны өдөр Хойд Солонгос Япон тэнгисийн зүг баллистик пуужин. харвасан байна. Энэ пуужин бага тусгалын баллистик пуужин байсан бөгөөд 570 км зам туулаад Япон тэнгист унасан гэж Өмнөд Солонгосын цэргийнхэн мэдэгджээ. Пуужинг 12 дугаар сарын 17-ны 22.38 цагт хөөргөсөн байна. 

Харин өнөө өглөө буюу 12 дугаар сарын 18-ны даваа гарагт Хойд Солонгос дахин пуужин хөөргөсөн талаар Ёнхап мэдээллээ. Япон тэнгисийн зүг харвасан энэ пуужин тив алгасагч баллистик пуужин байж болзошгүй гэж Японы Засгийн газар үзэж байгаа аж.

Одоо Өмнөд Солонгос болон Японы эрх баригчид пуужингийн нислэг, туулсан замын талаарх мэдээлэл цуглуулж, холбогдох албаныхан бэлэн байдалд ажиллаж байгаа гэж ТАСС агентлаг мэдээлжээ.

Г.Бямбасүрэн