УИХ дахь АН-ын бүлгийн гишүүд мэдээлэл хийлээ.

УИХ-ын гишүүн Н.Ганибал 

"Монголчууд бухын доодохыг харж үнэг турж үхнэ гэж ярьдаг. Эрх баригчдын шийдвэрийг харсаар байгаад монголчууд хүнд байдалд орлоо. Асуудал өнөөдөр шууд болсон юм биш хоёр сарын өмнөөс яригдаж байсан ч өнөөдөр бахь байдгаараа байна. Өнөөдөр албан тушаалтнууд шийдэл хэлсэнгүй. Улаанбаатарт таван цаг дараалж байж, АИ 95 аваад салж байна. Хөдөө орон нутагт бүр дизель түлш олдохгүй, зуд турхантай, идшээ ч идэж чадаагүй, өвөлжөө хаваржаандаа бууж чадаагүй байна. Зарим компаниуд туслах гэж тэжээл, өвс явуулъя гэсэн ч түлштэй машин алга. Ийм асуудал өнөөдөр тулаад байна. Эрх баригчдын бодлого хаана байна вэ.

Сүүлдээ Улаанбаатар хотын түгжрэл гайгүй болчихож, бензин шатахууныг нь өгөхгүй байж байгаад түгжрэлээс салъя гэсэн юм биш биз дээ. Агаарын бохирдлыг бага байлгахын тулд машинаас гарч буй утааг багасгаж байгаад шийдэх гэж байгаа юм биш биз дээ гэсэн хардлага байна. Асуудлыг бүлгийн хуралдаанаар хурцаар тавьсан. Ж.Ганбаатар сайд долоо хоногийн дотор асуудлыг шийднэ гэсэн. Үнэндээ үнэмшихгүй байна. Иймд Ерөнхий сайдад Уул уурхайн сайдад хариуцлага тооцож, огцруулах шаардлагыг хүргүүллээ" гэв.