Барууны орнууд Газын зурвас болон Украинд болж буй үйл явдалд харилцан адилгүй хандаж, хоёр нүүр гаргаж байна гэж "New York Times" сонин шүүмжилжээ. 

Сүүлийн 20 сарын хугацаанд АНУ-ын эрх баригчид Украинд хийж буй үйлдлийнх нь төлөө Оросыг байнга шүүмжилж, буруушааж байсан бол харин одоо Газын зурваст Израилын арми цохилт өгч байхад Вашингтон Израилыг дэмжиж байгаа нь дэлхий дахины үзэл бодлыг өөрийн талд оруулах хүчин чармайлтад нь шинэ бэрхшээлийг бий болгох эрсдэлийг дагуулж байна гэж "Нью-Йорк Таймс" сонин шүүмжилсэн байна. 

"Барууныхан хоёр нүүр гаргаж байгаа нь Арабын ертөнцийн тэргүүнүүдийн зүгээс шүүмжлэлд өртлөө. Барууныхан Украин Европын нутагт байдаг тул тэнд болсон үйл явдлыг онцгойлж үзэж байгаа нь Ойрх Дорнодод нөхцөл байдал хурцадсан энэ үед Африк, Ази, Латин Америк дахь дургүйцлийг улам өдөөж байна. Эдгээр орнуудад барууныхан Арабын орнууд дахь сөргөлдөөнөөс хохирсон хүмүүсээс илүү Украины дүрвэгчдэд л санаа зовнидог гэсэн төсөөлөл бууж байна" хэмээн Нью-Йорк таймсын нийтлэлд өгүүлсэн байна.

Тиймдээ ч барууны орнууд Энэтхэг Турк зэрэг орнуудаар Оросын эсрэг хориг арга хэмжээг дэмжүүлж чадаагүй, Газын зурвас дахь үйл явдлыг харгалзвал, Оросын эсрэг фронтыг өргөжүүлэх гэсэн барууны хүчин чармайлт ойрын үед амжилт олох шинжгүй гэж нийтлэлд онцолжээ.

Г.Бямбасүрэн