Хятадын хамгийн алдартай вирус судлаачдын нэг, сарьсан багваахайн коронавирусийг судлаж байснаараа "сарьсан багваахай эмэгтэй" хочтой болсон эрдэмтэн Ши Жэнли дэлхий даяар коронавирусийн шинэ төрлүүд дэгдэнэ хэмээн сэрэмжлүүлжээ. 

Уханийн вирус судлалын хүрээлэнгийн эрдэмтэд Emerging Microbes&Infections эрдэм шинжилгээний сэтгүүлд нийтлэлээ хэвлүүлсэн бөгөөд энэ нийтлэлд хүн коронавирусийн 40 төрлийн халдвар авах эрсдэл байгааг онцолсон байна. Коронавирусийн 40 төрлийн талаас илүү хувь нь хүнд ихээхэн өндөр эрсдэлтэй гэнэ.

Энэ судалгааны ахлагч Ши Жэнли амьтан, тэр дундаас сарьсан багваахайнаас хүнд дамжих вирусуудыг судладгийн улмаас "сарьсан багваахай эмэгтэй" хочтой болсон. Дэлхий даяар дэгдсэн коронавирусийн цар тахлын үеэр энэ вирусийн гарал үүслийн тухай маргаанд эрдэмтэн Ши Жэнлигийн нэр байнга хавчуулагдаж байв. Тодруулбал, түүний ажилладаг Уханийн вирус судлалын хүрээлэнгийн лабораториас вирус алдагдсан гэх хувилбар хүчтэй яригдаж байлаа. 2021 онд ДЭМБ -ын шалгалтын багийнхан Уханьд очиж ажиллан, Уханийн вирус судлалын хүрээлэнгийн лабораториас вирус алдагдсан гэх баталгаа огт олоогүй ч вирус дэлхий даяар түгэх эхлэл нь лаборатори байсан гэх яриа одоо хүртэл явсаар л байгаа.